Cristiano Ronaldo nuk njeh moshë. Pavarësisht viteve që ikin, tek CR7 nuk ndodh asnjë ndryshim. E këtu sigurisht nuk po flasim për fizikun e tij, por për rendimentin e jashtëzakonshëm që portugezi jep çdo herë që zbret në fushën e lojës.

Si një djalosh që mezi pret të luajë e të shënojë, Cristiano ka të njëjtën dëshirë, pavarësisht se këtë vit ai do të fryjë 40 qirinj. Prefiksi do të ndryshojë, por nuhatja e tij për goldin absolutisht jo.

Lojtari portugez ka shënuar të enjten golin e tij të parë për vitin 2025. Një gol që përveç faktit se ndihmoi Al Nassr-in të merrte fitoren 3-1 kundër Al Okdudit, në sfidën e vlefshme për javën e 14 të kampionatit në Arabi, ky gol mbart një statistikë të veçantë me vete. Do të vinte minuta e 42 kur Ronaldo do të transformonte një 11 metërsh të fituar nga Sane.

Ronaldo ia ka dalë të shënojë për të 24-tin vit radhazi. 5 herë fituesi i Topit të Artë e ka dërguar topin në rrjetë për herë të parë në vitin 2001 dhe që atëherë ka shënuar gol në secilin vit që ka kaluar. Tashmë sulmuesi i Al Nassr-it ka shkuar në kuotën e 917 golave në karrierë. Një statistikë e jashtëzakonshme. Objektivi i shprehur nga CR7 se kërkon të mbyllë karrierën pasi të ketë realizuar 1000 gola në karrierë mund të mos jetë më utopike, pasi në Cristiano do të vijojë të mbajë të njëjtin ritëm nuk do të ishte çudi, që portugezi të realizonte këtë objektiv që deri tani duket se është i paimagjinueshëm.