Një video e rëndë, skena dhune, grushta në bark, në një vend që dëshiron të quhet i civilizuar, shkruan tanea.gr. Ky është një video dokument i një krimi horror në burgun grek të Korydhalos, i cili tregon vrasjen e një të burgosuri shqiptar.
Në video shfaqet dhuna midis të burgosurve në korridoret e burgut, ndodhur më 14 janar të këtij viti, ku humbi jetën shqiptari Albert Bako, 37 vjeç. Shqiptari ecën nëpër korridor dhe sulmohet nga dy të burgosur të tjerë.
Oficerët e burgut duken të paaftë për të ndërhyrë dhe nuk bëjnë thuajse asgjë. Në fund të videos viktima duket në një barelë dhe transferohet në spitalin e burgut.
Një situatë që të kujton Meksikën dhe Kolumbinë. Gazeta greke “TaNea”, shkruan se muajt e fundit në Koridhalo kanë ndodhur rreth 10 përplasje të përgjakshme, 26 vdekje të dënuarish për shkaqe të ndryshme dhe dhjetëra plagosje, disa prej të cilëve shqiptarë.
https://youtu.be/XiyH2YtbBxw
Albert Bako sapo ishte transferuar në burgun e Koridhalos në Greqi nga burgu i Hania kur u vra nga të dënuar të tjerë. Transferimi i tij ishte marrë vesh nga disa anëtarë të një bande rivale, të cilët e futën në kurth dhe e vranë.
Ai ishte i dënuar për sulmin që bëri në Mikrolimano në një lokal në nëntor të vitit 2014, ku u plagosën 14 persona dhe shkaku i konfliktit ishte një kërcimtare.
Gjithashtu ai është përfshirë edhe në vrasjen e avokatit grek Jorgos Antonopoulos, me porosi të një personi të tretë për një çështje korruptive.
Bako pritej të dilte përpara gjykatës për vrasjen e avokatit grek Mihali Zafiropoulos, pasi për këtë cështje ai dyshohej si porositës i krimit.
(m.k/BalkanWeb)