Në fshatin Sevaster, në Vlorë, ka pasur tensione pas një denoncimi në emisionin “Tak Fak” në News24 nga Dervish Kokaj, i cili kthehet nga emigracioni dhe zbulon se varret e gjyshërve të tij ishin mbjellë me ullinj.
Sipas tij, varret janë mbjellë nga Tozo Tozaj, një banor i fshatit, dhe pas këtij zbulimi, ai ka bërë ankesë tek deputeti Vullnet Sinaj, kryetari i bashkisë dhe policia, por pa asnjë reagim zyrtar.
Në një bisedë telefonike me administratorin e Komunës Sevaster, ai e pyet për situatën e varreve dhe merr një përgjigje shqetësuese.
Në fillim, administratori pranon që ka varre, por pastaj thotë që merrni skrepin dhe po gjetët një varr, futeni në gropë atë që ka mbjellë ullinjtë. Ai gjithashtu shton se të gjitha tokat e Sevasterit janë zaptuar dhe mbjellë me ullinj.
Rovena, gazetarja e “Tak Fak”, shkoi në banesën e Tozo Tozaj për të parë më nga afër situatën, ku atje Tozaj ka dalë me sëpatë dhe ka kërcënuar grupin e xhirimit, duke fyer dhe kërcënuar për të vrarë Dervish Kokajn.
Kjo ka shkaktuar një situatë të tensionuar në fshat, ndërkohë që policia ka ndërhyrë dhe ka bërë një kontroll në banesën e Tozo Tozaj.
Përveç kësaj, grupi i xhirimit ka bërë një kallëzim në polici për kërcënimet dhe shkelje të ligjit.
Sidoqoftë, situata mbetet e tensionuar dhe ende nuk ka pasur asnjë masë konkrete nga autoritetet lokale ose policia për të sqaruar këtë ngjarje.
(BalkanWeb)
