Shqipëri-Francë ishte ndeshje perfekte, momenti perfekt, për të inauguruar stadiumin e ri kombëtar. Organizatorët nxituan jo për të vënë në jetë këtë skenar, pavarësisht se stadiumi i ri, mbi të gjitha tapeti nuk ishte ende gati. Jo të gjithë kishin mundësi të ndiqnin live këtë sfidë, ku sigurisht interesimi më i madh ishte për të parë stadiumin e ri, vetëm 22 mijë nga 100 mijë tifozë e patën këtë fat.

Të gjithë ata që duan të shohin stadiumin e ri, mund ta kenë shumë shpejt këtë mundësi, që në derbin e radhës, Partizani-Tirana. “Arena Kombëtare” nuk do të jetë në dispozicion vetëm të ekipit përfaqësues por do të jetë në funksion edhe të Superligës. 3 nga 10 klube kanë shfaqur menjëherë interesimin për të zhvilluar ndeshjet në impiantin më të ri në kryeqytet, Partizani, Tirana dhe Kukësi.

Klubi i kuq është ekipi që ka hedhur hapat e parë, duke kërkuar që ndeshja Partizani-Laçi, në program për tu zhvilluar këtë të hënë, të luhej në stadiumin e ri, kërkesë e cila është hedhur poshtë duke parë gjendjen jo të mirë të fushës. Sipas të gjithë gjasave, ndeshja pasuese në këtë impiant pritet të jetë Partizani-Tirana, derbi i tretë sezonal, në program për tu zhvilluar më 5 dhjetor, pasi klubi i kuq ka depozituar një kërkesë zyrtare në FSHF.

Çdo skuadër që dëshiron të zhvillojë një ndeshje në stadiumin e ri duhet ta paguaj fillimisht afro 5 milion lekë të vjetër, një shumë mese e përballueshme për çdo ekip, aq më tepër kur bëhet fjalë për një derbi ku fitimet janë shumë të mëdha për klubin organizator.
(BalkanWeb)