Dëshmitari okular palestinez Mounir Khdair tha se snajperi izraelit që vrau shtetasen turko-amerikane Aysenur Ezgi Eygi në Bregun Perëndimor të premten e kaluar, bërtiti nga gëzimi pasi e qëlloi atë.
“Pasi e qëlloi atë, ai ishte i lumtur, bërtiti nga gëzimi”, tha Khdair për Anadolu.
“Është koha që kjo vrasje të çojë në llogaridhënie”
Jonathan Pollak, një aktivist izraelit i cili ka marrë pjesë në protestat kundër Izraelit në rajon për shumë vite, tha se në ditën e të shtënave në fshatin Beita, afër Nablusit, ushtarët shpërndanë shpejt protestuesit pas namazit të xhumasë në fshat me gaz lotsjellës dhe plumba të vërtetë.
“Ushtari që e bëri këtë kreu një qitje vrasëse. Kjo e shtënë vrasëse nuk ishte incident i izoluar. Kjo ndodh në kontekstin e përshkallëzimit dhe dhunës në Bregun Perëndimor. Plumbi që vrau Aysenurin është i njëjti plumb që vrau njerëz në Nur Shams dhe Jenin”, shtoi ai.
“Është i njëjti plumb që vrau një vajzë 13-vjeçare në të njëjtën ditë, vetëm pak kilometra në jug të këtij vendi. Këto janë të njëjtat plumba të financuar nga Amerika që Izraeli përdor për të kryer gjenocid në Gaza pa u ndëshkuar aspak”, theksoi Khdair.
“Kjo ndodh sepse bota nuk kërkon llogari dhe bota, në mënyrë të turpshme, mbështet Izraelin. Është koha që nëse jo për ndonjë gjë, kjo vrasje të sjellë njëfarë llogaridhënieje dhe fund të kolonializmit izraelit mbi popullin palestinez”, vazhdoi më tej ai.
Në lidhje me pretendimin e ushtrisë izraelite se ushtarët hapën zjarr pasi ndiheshin të kërcënuar nga njerëzit që gjuanin me gurë, Pollak nënvizoi se situata ishte shumë e qeta kur ndodhën të shtënat.
Zyra e zëdhënësit të ushtrisë izraelite nuk iu përgjigj Anadolus në pyetjet rreth vdekjes së Eygit.
Eygi, 26 vjeçe, shtetase e dyfishtë turko-amerikane, u qëllua për vdekje nga forcat izraelite gjatë një proteste të së premtes kundër vendbanimeve të paligjshme izraelite në Beita në Bregun Perëndimor të pushtuar.
Vrasja e Eygit i bëri jehonë rastit të gazetares amerikano-palestineze Shireen Abu Akleh, e cila u vra në mënyrë të ngjashme në vitin 2022, duke shkaktuar zemërim të gjerë.
Dhuna kundër protestave në Bregun Perëndimor zhvillohet në mes të ofensivës së vazhdueshme shkatërruese ushtarake të Izraelit në Rripin e Gazës që nga sulmi i Hamasit tetorin e kaluar.
