40 minuta pas ngjarjes së rëndë të ndodhur te Liqeni Artificial i Tiranës, policia thotë se ka identifikuar dhe shpallur në kërkim dy personat e dyshuar për vrasjen e 62-vjeçarit Haxhi Baxhinovski.
Ky i fundit ishte duke vrapuar tek kodrat e liqenit bashkë me djalin e tij kur dy personat i janë afruar dhe e kanë qëlluar për vdekje, ndërsa i biri por edhe kalimtarë të rastit i shpëtuan fatmirësisht plumbave. Baxhinovski ishte baba i dy djemve, Henri dhe Eliot, por nuk dihet ende cili prej tyre e shoqëronte sot te liqeni për vrap.
Gazetarja Dorjana Bezat raporton për “BalkanWeb” se personat që qëlluan mbi fierakun, referuar dëshmive të mbledhura në vendngjarje ishin të maskuar dhe të veshur me xhupa të zinj. Ata janë larguar me shpejtësi menjëherë pas krimit.
Referuar burimeve policore, bëhet fjalë për dy persona nga Fieri me incialet I.S. dhe I.B. Po ashtu ngjarja dyshohet se ka ndodhur si pasojë e një konflikti të hershëm, i cili pritet të sqarohet nga momenti në moment.
NJOFTIMI I POLICISE
Tiranë
Informacion paraprak
Rreth orës 18:15, tek Liqeni Artificial, është vrarë me armë zjarri, shtetasi H. B., 62 vjeç.
Policia ka identifikuar autorin dhe po punon për kapjen e tij.
(m.a/BalkanWeb)
