SHKODER
Të tjera detaje dalin në dritë nga ngjarja që tronditi sot Shkodrën, ku një person mbeti i vrarë dhe një tjetër u plagos pas një atentati. Ngjarja në fjalë ndodhi teksa Fatos Verracaku ishte duke pirë kafe në një lokal në zonën e Markatës në lagjen “Rus” në Shkodër bashkë me mikun e tij Fatmir Mehaj. Ai ndërroi jetë në spital për shkak të plagëve të marra, ndërsa miku i tij është jashtë rrezikut për jetën.
Burime nga vendngjarja bëjnë thanë për ‘BalkanWeb’ se autori i vrasjes ka patur të veshur një xhakete ngjyre të kuqe me të bardhë, ndërsa në kokë mbante një skafandër të kuqe.
DINAMIKA
Duke ndërtuar dinamikën e ngjarjes, në sajë të këtyre informacioneve thuhet se autori është ulur nga motori shumë shpejt dhe është afruar deri në rreth 10 metër. Mes të tjerash ‘BalkanWeb’ mëson se ai ka qëlluar në ecje e sipër. Pasi ka qëlluar objektivin, që thuhet se ishte Fatos Verracaku, i është afruar dhe e ka qëlluar edhe dy herë në kokë viktimën për t’u siguruar se ka vdekur. Autori ka qëlluar vetëm me njërën dorë, ndërsa raportohet se ka patur një saktësi të madhe duke qenë preçiz, pra një vrasje profesioniste. Më pas është larguar duke hipur ne motor, që drejtohej nga një tjetër person. Sapo ka hipur në motor, autori ka qenë duke futur pistoletën brenda, por më pas ka qëlluar edhe njëherë në ajër për të dhënë ndoshta edhe një mesazh.
Gjatë kohës kur qëlloi, thuhet se autori e ka pasur xhamin e skafandrës të hapur, por nën të sipas burimeve mbante një kapuç, pra ka qene i maskuar. Ndër të tjera thuhet se motori që u gjet duke u djegur në Zooteknike ka qenë ngjyre gri, tip TMAX 550 kubik, mjet që ka një shpejtësi të madhe. Ndonëse në vendin ku ndodhi krimi i rëndë ka pasur shumë njerëz, autori nuk ka gabuar në asnjë prej plumbave. Në vendin e ngjarjes mësohet se ka qenë rastësisht edhe një efektiv i policisë, civil, ndërsa ai ka tentuar që ta ndjekë autorin duke vrapuar, por motori është larguar me shpejtësi. Ndërkohë, personi që drejtonte motorin ka patur skafandër në kokë, ndërsa ka qenë i veshur me rroba ngjyrë gri. Policia po punon për zbardhjen e plotë te kësaj ngjarje ndërsa ende nuk ka rënë në gjurmët e autorëve të mundshëm.
(ed.me/BalkanWeb)
