Armand Duka është ka fituar mandatin e pestë si President i Federatës Shqiptare të Futbollit. Ai mundi dy kandidatët e tjerë Bashkim Fino dhe Shpëtim Hala.


Në votimin e raundit të dytë, Duka mori 38 vota përballë 24 votave të Finos. 3 vota dolën të pavlefshme.


Pas përfundimit të numërimit, Duka foli për gazetarët duke vlerësuar maksimalisht organizimin e procesit të votimit në Asamble.


“Nga të gjithë problematikat se është diskutuar gjatë, ka shumë gjëra që do reflektojmë dhe t’i përmirësojmë për të mirë e futbollit në të ardhmen. Jam i lumtur dhe për mënyrën si u zhvillua kjo asamble. Sot kemi bërë shumë punë për demokracinë e organizimit të zgjedhjeve”.

Ndërsa në lidhje me fjalët e Finos se do ankimojë rezultatin, Duka ngulmoi sërsish se të gjithë e panë procesin demokratik të votimit.

“Të gjithë panë dhe demonstruan një nivel të lartë të organizimit të votimeve. Nuk jam trup gjykues, jam President i sapo zgjedhur dhe do angazhohem për të plotësuar premtimet e mia,” u shpreh Presidenti i FSHF.

Bashkim Fino ka uruar Armando Dukën për fitoren e mandatit të 5-të në krye të Federatës Shqiptare të Futbollit. Por pavarësisht kësaj, ai thotë se ky proces ishte i parregullt, pasi lista e anëtarëve duhet të ishte e pavarur. Duke folur për mediat, pas përfundimit të Asamblesë së Përgjithshme Zgjedhore të FSHF, Fino tha se do ndjekë rrugën ligjore.

“Kur ke një listë të pandershme përpara nuk mund të pretendosh më tepër për të thyer rezultatin. Natyrisht që do ishte një garë më e fortë, nëse do shikohej platforma më e mirë. Por lista duhet të ishte e pavarur.
Realisht anëtarët e Asamblesë e ngritën çështjen e shoqatave. Por komisioni i vlerësimit lexoi një raport që e kishte bërë paraprakisht gati, përgjigjet që dhanë juristët këtu, treguan se kishte konflikt interesi.

Qëndrimi im nuk ka të bëjë me faktin nëse dua apo jo unë të jem president, por ky proces duhet të jetë i rregullt. Rezultati është i anëtarëve të asamblesë të cilët janë të certifikuar nga ky komitete të cilët ne i kundërshtojmë. Unë kam të drejtë të vazhdoj procesin ligjor. Gjithsesi unë i urova suksese Dukës. Kjo bëhet për të ardhmen e futbollit shqiptar dhe jo për mua personalisht”, tha Fino pak më herët.

 (e.f/BalkanWeb)

Etiketa: