TIRANË

Për Artan Fugën angazhimi i tij është një mision të cilit ia vlen t’i kushtosh dhe jetën dhe zyra e Presidentit nuk ka rëndësi. I ftuar në “A show” në News24 Fuga tha se politikani shqiptar e ka shtypur intelektualin shqiptar. Ai u shpreh se ka ardhur momenti ku sa më shumë intelektualë të futen në politikë.


Po sikur të bashkohen disa njerëz pro Fuga dhe t’ju propozojnë juve që të bëheni presidenti i ardhshëm i Shqipërisë, çfarë do të kishit thënë?


Ti e bën golin në sekondën e fundit. Kjo është një pyetje që nuk ka të bëj me mua. Unë e kam thënë që angazhimi im qytetar dhe intelektual është të kontribuoj në zhvillimin e elitave intelektuale, universitare, të zhvilloj kritikën sociale, të shprehem vetë, të krijoj struktura ku intelektuali të shprehet. Ky është një mision i jashtëzakonshëm dhe unë po ju them pa modesti që këtij misioni ia vlen t’i kushtosh jetën.


Nuk do lodhem kurrë, deri sa Shqipëria të mos dëgjojë vetëm fjalime politike por të fillojë të mendojë intelektualisht. Ua them me sinqeritet politikani shqiptar e ka shtypur intelektualin shqiptar. Kjo është kryesorja dhe kjo është strategji e madhe. Ç’rëndësi ka një president para kësaj. S’ka asnjë lloj rëndësie. Nuk mendoj se forcat dhe energjitë e mëdha të Shqipërisë qëndrojnë tek zyra e Presidentit.

Dua të them një gjë akoma më delikate, unë mendoj që ka ardhur momenti ku sa më shumë intelektualë të futen në politikë, unë apo të tjerë s’ka rëndësi. Ka boll të rinj që mund të japin kontribut. Unë ëndërroj që në Kuvendin e ardhshëm të Shqipërisë të ketë lista intelektuale, grupe intelektualësh që të jenë bashkëudhëtarë por edhe grupe presioni me partitë politike. Unë mendoj që koha po vjen për këtë.

(m.k/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb