Presidenti i zgjedhur i SHBA-ve Donald Trump pritet të emërojë ish-guvernatorin e Arkansas, Mike Huckabee si ambasador në Izrael.
Huckabee është një mbrojtës i vendosur i Izraelit dhe emërimi i tij i synuar vjen pasi Trump ka premtuar të përafrojë politikën e jashtme të SHBA më afër me interesat e Izraelit, ndërsa ai zhvillon luftëra kundër Hamasit në Gaza dhe Hezbollahut në Liban.
“Mike ka qenë një shërbëtor i madh publik, guvernator dhe udhëheqës në besim për shumë vite”, tha Trump në një deklaratë. “Ai e do Izraelin dhe popullin e Izraelit, po ashtu edhe populli i Izraelit e do atë. Ai do të punojë pa u lodhur për të sjellë paqen në Lindjen e Mesme”, u shpreh Trump.
Huckabee ka udhëhequr vizita me pagesë të grupeve turistike në Izrael për vite me radhë, duke reklamuar shpesh udhëtimet në mediat e lajmeve me prirje konservatore, shkruan AP.
David Friedman, i cili shërbeu si ambasador i Trump në Izrael në mandatin e tij të parë, tha se ishte “i emocionuar” nga zgjedhja e Huckabee nga Trump.
