Ndalesa e parë e PS në rajonin nr.3 të qytetit të Vlorës në kuadër të çeljes së takimeve publike u zhvillua në sheshin e rikonstruktuar të “Tre Racave”. Një premtim i mbajtur gjatë mandatit të parë të kandidatit, Dritan Leli.


“Në mandatin e ri do të mundësojmë rikonstruksionin e teatrit ‘Petro Marko’ të Vlorës. Do t’i rijapim vlerë muzeut më të rëndësishëm të Shqipërisë, Muzeut Kombëtar të Pavarësisë. Kemi miratuar pak muaj më parë edhe pjesën e parë të projektit të shëtitores pas tunelit në drejtim të Radhimës e Orikumit. Do të ndërtojmë korsi të dedikuara biçikletash për një aks me gjatësi 20 km” -tha Leli.

Ai u kërkoi qytetarëve të bashkohen në 30 Qershor, për të cuar më tej projektet për zhvillimin e qytetit. “Nga ky takim le të filloj festa, vlonjatët të mbështesin zhvillimin europian të Shqipërisë”, shtoi Leli.


Nga Vlora, kordinatori politik i Qarkut, Damian Gjiknuri deklaroi se zgjedhjet do të mbahen në 30 qershor.
“Dekreti i presidentit është një vrim në ujë, nuk ka asnjë vlerë juridike. Sepse zgjedhjet përcaktohen njëherë dhe zgjedhjet nuk i kemi në dorë ne sa herë kemi qejf të ndryshojmë datë. Një votë për stabilitetin dhe që ky vend të mos kthehet më si më parë duhet ta bëjmë të gjithë. Çdo vlonjat! Mjaft ky vend ka vuajtuar dhe njerëzve që e kanë mbajtur peng duhet t’ ju japim një mësim. Jo dhunës, jo djegies e jo Shqipërisë në udhëkryq. E kush më mirë se Vlora mund ta bëj këtë?!”, tha Gjiknuri.
Sipas Gjiknurit, koha e fjalëve ka mbaruar pasi vota në 30 Qershor është votë për Integrimin e Shqipërisë.


(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb