Ukraina iu përgjigj sulmeve ruse të ditëve të fundit me pasoja të rënda në jetë njerëzore, me breshëri bombash në disa rajone. Sulmet nga dronët e Kievit kanë mbërritur deri në Moskë. Ministria e Mbrojtjes e Rusisë pretendoi se sistemet e saj të mbrojtjes ajrore rrëzuan gati 160 dronë ukrainas në 15 rajone, duke përfshirë dy mbi Moskë. Sulmi ukrainas gjatë natës në Rusi është më i madhi që nga fillimi i luftës në shkurt 2022.
“Gjatë natës, regjimi i Kievit tentoi një sulm të tmerrshëm duke përdorur dronë kundër objektivave në territorin rus, por sistemet e mbrojtjes ajrore në detyrë kapën me sukses dhe shkatërruan 158 dronë ukrainas me krahë fikse”, tha Ministria e Mbrojtjes në një deklaratë.
Ushtria shtoi se shumica e dronëve u shkatërruan në rajonet kufitare të Kursk, Bryansk, Voronezh dhe Belgorod.
Breshëria ajrore vjen vetëm disa ditë pasi më shumë se 200 dronë dhe raketa ruse shënjestruan infrastrukturën energjetike të Ukrainës në një nga sulmet më të mëdha të kësaj natyre. Sulmi vjen gati një muaj që kur trupat ukrainase nisën një ofensivë të befasishme ndërkufitare në rajonin jugperëndimor të Kurskut, duke pushtuar mbi 1 mijë km2 territor rus.
Pranë Moskës, një termocentral me qymyr thuhet se u godit në sulmin me dron në shkallë të gjerë të së dielës, si dhe një rafineri nafte në pronësi të Gazprom brenda kufijve të qytetit.
“Një tjetër dron dëmtoi një dhomë teknike në rafinerinë e Moskës pasi u rrëzua. Për momentin po shuhet një zjarr i vogël”, shkroi në Telegram kryebashkiaku i Moskës Sergei Sobyanin.
Në rajonin qendror Tver, autoritetet raportuan rrëzimin e të paktën pesë dronëve në zonën e termocentralit Konakovo. Një video e paverifikuar e shpërndarë në internet tregonte një dron duke u përplasur në fabrikë, duke shkaktuar një shpërthim të madh. Në të gjithë Rusinë, dhjetëra fluturime u vonuan ose u ridrejtuan për shkak të sulmeve gjatë natës, raportoi gazeta e lajmeve të biznesit RBC.
Rusia dhe Ukraina kanë intensifikuar sulmet e tyre ndaj infrastrukturës energjetike të njëra-tjetrës në muajt e fundit, me Kievin që synon të pengojë kapacitetin e Moskës për të kryer operacione ushtarake.
(BalkanWeb)
