Policia në Tiranë, në kuadër të operacionit “Drug party” ka arrestuar katër shtetas. Efektivët në kryeqytet shprehen se janë sekuestruar 300 tableta të dyshuara narkotike ekstazi.
Gazetari Igli Çelmeta raporton për BalkanWeb se në pranga kanë rënë shtetasit Ergis Noka, Drin Vjerdha, Kristofor Pandelejmoni dhe Mario Çerra. Ergis Noka është djali i drejtuesit të portalit Publik.al (Publik.live), Naim Noka. Gjatë kontrolleve që ka kryer policia te zyrat e këtij portali në zonën e ish-Bllokut janë gjetur të magazinuar pajisje që përdoren për kultivim kanabisi. Pajisjet ishin të magazinuara te zyrat e portalit.
“Finalizohet nga Sektori për Hetimin e Narkotikëve, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në kuadër të një procedimi penal ndjekur me metoda proaktive, operacioni policor i koduar “Drug party”.
Arrestohen 4 shtetas.
Sekuestrohen 300 tableta të dyshuara narkotike ekstazi (MDMA).
Shërbimet e Sektorit për Hetimin e Narkotikëve në vijim të punës për goditjen e paligjshmërisë në çdo formë të saj, në kuadër të një procedimi penal ndjekur me metoda proaktive, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe kanë finalizuar operacionin policor të koduar “Drug party”.
Si rezultat i këtij operacioni u arrestuan në flagrancë shtetasit E. N., 18 vjeç, D. V., 18 vjeç, K. P., 19 vjeç, dhe M. Ç., 24 vjeç, të gjithë banues në Tiranë.
Shërbimet e Policisë, kanë lokalizuar në rrugën “Pjetër Bogdani”, shtetasit e larpërmendur dhe gjatë kontrollit fizik të tyre, iu gjetën dhe sekuestruan, në cilësinë e provës materiale, 300 tableta të dyshuara narkotike e llojit ekstazi (MDMA).
Gjithashtu gjatë kontrollit të dyqanit të shtetasit E. N., në rrugën “Pjetër Bogdani”, u gjetën e sekuestruan me cilësinë e provës materiale, disa pajisje elektrike të cilat dyshohet se përdoren për kultivimin të lëndës narkotike kanabis. Materialet i kaluan Prokurorisë, për veprime të mëtejshme procedurale”, njofton policia.
(BalkanWeb)
