Nëse nuk do të ishte për derbin e “Madonnina”, me shumë mundësi Conceiçao do të ishte shkarkuar me kohë. Në çdo moment delikat që portugezi ka kaluar në Milano, për ironi të fatit në ndihmë i ka ardhur Inter, kjo pasi Conceiçao nuk njeh humbje ndaj rivalëve të përjetshëm. Edhe pas derbit të parë në fazën gjysmëfinale të Kupës së Italisë, Milani i tij doli i pamposhtur, por këtë herë diskutimi është ndryshe pasi nuk ka vend për të festuar.

Pavarësisht “X” 1-1, Conceiçao e sheh gotën gjysmë plot: “Të presim tani sfidën e kthimit pasi ne dëshirojmë ta luajmë dhe të fitojmë këtë trofe. Ishte një ndeshje e ekuilibruar, kundër një rivali të vështirë, që të lejon pak, por ne arritëm ta administronim mirë. Ashtu si Inter edhe në kishim shanset tona, mbi të gjitha në pjesën e dytë. Për fat të mirë, tani kemi më shumë kohë për të përgatitur ndeshjen e kthimit”, u shpreh Conceiçao.

Simone Inzaghi del nga ky derbi me një shije pozitive, pasi ekipi i tij arriti të marrë një barazim pavarësisht mungesave të shumta: “Ishte një ndeshje e fortë, ashtu si të gjithë derbet. Nuk është e lehtë të luash kundër Milanit me 14 lojtarë, i kërkova djemve të bënin një sforco. Ky është një muaj i rëndësishëm, thelbësorë. Kemi ardhur në prill me shumë krenari, kemi luajtur ndeshje të mëdha, tani kemi pak kohë për t’u rikuperuar”, theksoi Inzaghi pas derbit kundër Milan.

(BalkanWeb)