Partizani hedh sytë te ndeshja e radhës, ajo kundër Egnatias pas tri ditësh në stadiumin “Arena e Demave”. Të kuqtë duhet të mbledhin forcat dhe të bëjnë maksimumin në një ndeshje tejet të vështirë, ku qëllimi është fitorja, pasi tashmë Elbasani ndodhet vetëm një pikë larg.
Lajmi i mirë për trajnerin Gega është rikthimi i mbrojtësit Altin Bytyçi, i cili shleu pezullimin e katër kartonëve të verdhë në derbi dhe tashmë mund të luajë. Sakaq, edhe Atanaskoski pritet të jetë sërish i gatshëm. Mbrojtësi ishte në stol në ndeshjen me Tiranën, por duket se stafi nuk e ka vlerësuar për të luajtur as si zëvendësues. Me ardhjen e Gegës, për arsye të ndryshme, maqedonasi ka luajtur shumë pak.
Partizani u trondit të hënën nga Tirana, pasi u mposht në “Arena Kombëtare” me rezultatin 3-0, një disfatë që ul moralin e “Demave” dhe rrezikon fatin e gjithë sezonit, kur kanë mbetur dhe tri javë. Alban Hoxha e nxori tri herë topin nga porta e tij, ku dy prej golave u shënuan nga penalltia. Ernest dhe Zharmuni u treguan të saktë në gjuajtjet nga 11 metrat.
Në anën tjetër, asnjë gol, të paktën i rregullt, nuk u shënua nga të kuqtë e kryeqytetit. Humbje e tillë me 3 gola diferencë nuk ndodhte te Partizani prej 120 ndeshjesh. Sfidat e luajtura në Superiore, Kupë, Superkupë dhe Europë, nuk shikonin këtë statistikë negative nga 30 tetori i vitit 2022.
Asokohe ishte Egnatia që fitoi ndaj Partizanit me rezultatin e pastër 3-0. Më pas, të kuqtë janë treguar skuadër shumë stabël, që nuk shënonte shumë, por as pësonte lehtë. Në këtë vit 2025, të kuqtë janë kthyer të hasin vështirësi, ashtu siç ndodhi në derbi.
