Së paku dy njerëz kanë vdekur dhe disa të tjerë janë plagosur gjatë përleshjeve në kufirin mes Venezuelës dhe Brazilit, raportuan mediat lokale. Forcat e sigurisë së Venezuelës hapën zjarr ndaj një grupi civilësh, të cilët provuan të pengojnë bllokimin e kufirit nga ana e forcave ushtarake.


Sekretari i Përgjithshëm i Kombeve të Bashkuara, Antonio Guterres, ka bërë thirrje të shmanget dhuna në Venezuelë. Zëdhënësi i Kombeve të Bashkuara, Stephane Dujarric, tha se “çdo humbje e jetës është për keqardhje dhe se Sekretari i Përgjithshëm apelon fuqishëm që të shmanget dhuna”. Presidenti i kontestuar i Venezuelës, Nicolas Maduro, njoftoi për mbylljen e kufirit me Brazilin, për të bllokuar ndihmat humanitare, shkruan REL.


“Kufiri me Brazilin do të mbyllet plotësisht dhe absolutisht deri në njoftimin e radhës”, tha Maduro. Udhëheqësi i majtë tha në një fjalim televiziv se po shqyrton mbylljen e kufirit edhe me Kolumbinë për të ndaluar opozitën që të fusë ndihma. Dhjetëra vende, në mesin e tyre edhe SHBA-ja, e kanë njohur udhëheqësin e opozitës, Juan Guaido, si president të përkohshëm të Venezuelës.


Guaido e ka shpallur veten lider të përkohshëm gjatë protestave antiqeveritare në Venezuelë, muajin e kaluar.

 

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: