SKRAPAR- E gjithë familja e Presidentit të Republikës Ilir Meta dhe kryetares së LSI-së Monika Kryemadhi është ngjitur në malin e Tomorit për festën e përvitshme.
Fotoja familjare është publikuar nga Kryemadhi në “Facebook” ku uron të gjithë bektashinjtë për festën.
“Ju uroj të gjithë bektashinjve mbarësi e paqe!
Abaz Aliu i ndihmoftë të gjithë shqiptarët kudo!????”, shkruan Kryemadhi.
Më pas edhe Presidenti Meta ka publikuar foton nga maja e Tomorit.
Festa e Shenjtë e Bektashinjve organizohet nga 20-25 gusht dhe mbledh çdo vit në Teqenë e Kulmakut rreth 300-400 mijë pelegrinë nga e gjithë Shqipëria, diaspora e bota. Data 20 gusht shënon nisjen e pelegrinazhit drejt malit të Tomorrit, një mal i konsideruar “i shenjtë”, pasi në të prehet shenjtori i familjes së Profetit Muhamed, Abaz Aliu.
Gjatë 5 ditëve të pelegrinazhit, në Teqenë e Kulmakut dhe pranë varrit të Abaz Aliut kryhen ritet fetare të festës, ku çdo pelegrin falet për shëndet, mirësi e paqe në familjet e tyre.
Të gjithë besimtarët dhe pelegrinët që i bashkohen kësaj feste të shenjtë, në shenjë mirësie bëjnë kurban një qengj për veten dhe familjen.
(m.k/BalkanWeb)