Policia e Tiranës ka arrestuar pesë persona, dy prej të cilëve nën masën e sigurisë “Arrest me burg” dhe tre nën masën “Arrest në shtëpi”.

Policia njofton se këta shtetas, në bashkëpunim me njëri-tjetrin, i kanë hequr lirinë një 35-vjeçari, dhe e kanë kanosur atë për dhënie pasurie.

Gazetari Igli Çelmeta raporton se dy nga personat e lidhur me këtë ngjarje, Tori Xhecuka alias Hektor Xheçuka dhe Fredi Keta janë ende në kërkim.

Mbi to rëndon akuza “Heqje e paligjshme e lirisë dhe shtrëngim për dhënie pasurie.

Njoftimi: 

Finalizohet nga Sektori për Hetimin e Krimeve të Rënda në DVP Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, operacioni policor i koduar “The debt”.

Ekzekutohet masa e sigurimit personal “Arrest në burg”, për 2 shtetas, dhe masa e sigurisë “Arrest në shtëpi”, për 3 të tjerë.

Specialistët e Sektorit për Hetimin e Krimeve të Rënda në DVP Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, kanë organizuar dhe finalizuar operacioni policor të koduar “The debt”. Në kuadër të këtij operacioni:

-u ekzekutua masa e sigurisë “Arrest në burg”, për shtetasit: Aleksandër Osmani, 37 vjeç, Artan Pirraci , 50 vjeç, banues në Tiranë.

-u ekzekutua masa e sigurisë “Arrest në shtëpi”, për shtetasit: Naim Qarri, 52 vjeç, Sajmir Kolaveri , 42 vjeç dhe Adem Metkola, 46 vjeç.

Punohet për kapjen e shtetasit Tori Xhecuka alias Hektor Xheçuka, 36 vjeç dhe Fredi Keta, 49 vjeç.

Nga veprimet hetimore ka rezultuar se këta shtetas, në bashkëpunim me njëri-tjetrin, i kanë hequr lirinë një 35-vjeçari, dhe e kanë kanosur atë për dhënie pasurie.

Materialet i kaluan Prokurorisë, për veprat penale “Shtrëngimi me anë të kanosjes ose dhunës për dhënie pasurie”, dhe “Heqja e paligjshme e lirisë”, parashikuar nga nenet 109/b dhe 110/2 të Kodit Penal.