Një përleshje mes të dënuarve ka ndodhur sot në burgun e Rrogozhinës.

Gazetarja Dorjana Bezat raporton për “Balkanweb” se i plagosur ka mbetur shtetasi Bajram Myftaraj 26 vjeç. Ai është dërguar me urgjencë në Spitalin e Traumës në Tiranë.

Mësohet se Myftaraj ishte duke vuajtur dënimin në burgun e Rrogozhinës për trafik droge në Portin e Durrësit.  Ai është arrestuar më datë 12 nëntor 2016.

Njoftimi i policisë për arrestimin e Bajram Myftarajt më 2016:

Ministria e Punëve të Brendshme deklaroi sot se Policia Kufitare në bashkëpunim me Specialistët e Seksionit për Narkotikët, sekuestruan në Portin e Durrësit 26 kg marijuanë, dhe një person u arrestua.

Në një postim në faqen zyrtare të Ministria e Punëve të Brendshme, bëhet e ditur se ,“Policia Kufitare në bashkëpunim me Specialistët e Seksionit për Hetimin e Narkotikëve në Drejtorinë Vendore të Policisë Durrës, në vijim të punës së tyre për goditjen e rasteve të trafikimit të lëndëve narkotike, në bazë të informacioneve të marra në rrugë operative kanë sekuestruar rreth 26 kg marjuanë dhe arrestuar në flagrancë shtetasin Bajram Myftaraj 23 vjeç, banues në Tiranë”.

Më tej, MPB shpjegon detajet, ku shprehet se “Arrestimi Bajram Myftaraj u bë pasi në Portin e Durrësit, gjatë kontrollit të ushtruar në vijën e dytë në automjetin tip Renault me targa AA 277 PF që drejtohej nga shtetasi i lartpërmendur, u gjetën dhe u sekuestruan në cilësinë e provës materiale 94 pako me peshë rreth 26 kg lëndë narkotike e dyshuar e llojit marijuana”.

(d.xh/Balkanweb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb