Një i burgosur në burgun e Idrizovës ka ndërruar jetë, pas prerjeve të thella dhe fatale me xham. Ngjarja ka ndodhur dje rreth mesditës, kur nga Institucioni Korrektues i Idrizovës u raportuar se rreth orës 12:00 në këtë institucion, ka ndërruar jetë në dhomën e vizitës, i dënuari Durgut Fazliu nga Shkupi.

Sipas të dhënave që siguroi ALSAT, ngjarja ka ndodhur pas vizitës së disa familjarëve. 35-vjeçari ka mësuar nga motrat për ndarjen nga jeta të babait të tij, dhe në dëshpërim, ka thyer vetë xhamin, duke prerë dorën dhe nga gjakderdhja e madhe, i riu ka humbur jetën gjatë transportit drejt kompleksit të klinikave “Nënë Tereza”.

Mjekët që e morën atë vetëm sa kanë konstatuar vdekjen. Një ekip inspektues nga Sektori për punë të brendshme të Shkupit, ka kryer kontroll dhe konstatuar dinamikën e ngjarjes, dhe me urdhër të prokurorit, trupi i pajetë i të ndjerit është dorëzuar për obduksion.