NGA KLODIANA LALA* TIRANË- Aksioni kundër vjedhësve të energjisë, ndërtimeve pa leje, apo “gjuetia” për “shoferët” që drejtojnë mjetin pa patentë ka shtuar dukshëm numrin e dosjeve penale që po ndiqen nga prokuroria. Një fakt i tillë bie në sy referuar statistikave të institucionit, që drejtohet nga Petrit Fusha, ku përgjatë vitit 2014 janë regjistruar jo pak, por plot 4030 procedime më shumë sesa viti pasardhës. Në analizën vjetore të punës së këtij institucioni thuhet: “Një volum të konsiderueshëm pune në


tremujorin e fundit të vitit 2014 ka përbërë edhe vepra penale ‘Vjedhje e energjisë elektrike’, ku në referimin dhe hetimin e rasteve të kësaj vepre ka ndikuar bashkëpunimi mes policisë dhe ‘CEZ Shpërndarje’ sh.a. ,(aktualisht


OSHEE).


Konkretisht nga 730 procedime penale të regjistruara në vitin 2014 për nenin 137 të Kodit Penal, me referim të shërbimeve të policisë në bashkëpunim

me OSHEE-sha., 561 procedime janë regjistruar në tremujorin e fundit dhe

kryesisht me persona të arrestuar”, thuhet në material. Në vijim, prokuroria thekson se ka pasur një numër të lartë të hetimit për veprat penale “Drejtimi i mjeteve në mënyrë të parregullt” apo “Ndërtimi i paligjshëm”.

KËRKESA PËR PROKURORËT

Gjatë analizës së volumit të punës, drejtuesi i Prokurorisë së Tiranës, Fusha, u ka kërkuar vartësve të tij të jenë kujdesshëm sa u përket kërkesave për caktim mase sigurie, pasi ka pasur jo pak raste kur është firmosur për pushimin e çështjes. Në një kohë që i dyshuari për veprën penale ka qëndruar nën masën e sigurisë arrest me burg. “Numri i ulët i procedimeve

penale të pushuara, ku të pandehurit ose personat nën hetim kanë qenë në

gjendje arresti, tregon se ka vazhduar t’u kushtohet një vëmendje e madhe vlerësimit të provave që në momentin e caktimit të masës së sigurimit,

me gjithë problemet që u evidentuan më sipër. Në konkluzion, për vitin 2015 është e nevojshme që të bëhet edhe më shumë kujdes përsa i takon momentit të caktimit të masës së sigurimit “arrest në burg”, duke u kujdesuar që “arresti në burg”, të jetë vërtet një masë përjashtimore dhe të caktohet në ato

raste kur vlerësohet që masat e tjera janë të papërshtatshme”, thuhet në material.

Trupës së prokurorëve u është kërkuar të kryejnë hetime cilësore, duke mos përdorur si argument volumin e lartë të punës.

MASAT E DËNIMIT

Duket se edhe prokuroria e ka një ankesë për gjyqësorin. Prokurorët ankohen se në jo pak raste, gjykata ka firmosur për dënime të lehta, në

një kohë që nga ana e tyre, është kërkuar një dënim më i ashpër për autorin e veprës penale. “Edhe për këtë vit (2014) politika e dënimit e kërkuar nga prokurori është më e ashpër se sa dënimet që janë dhënë nga ana e gjykatës. Në 327 raste më tepër është kërkuar nga prokurori dënim me burgim dhe në 221 raste më tepër gjykata ka aplikuar pezullimin e dënimit. Politika e dënimit përsa u takon veprave të rënda dhe sensitive, veçanërisht kundër krimit ekonomik dhe korrupsionit, kultivimit dhe mbajtjes së lëndëve narkotike, etj.. ka qenë e ashpër dhe në përputhje me rrezikshmërinë e

tyre, shkallën e përhapjes, si dhe rëndësinë përsa i përket ndjeshmërisë publike. Është treguar vëmendje që rast pas rasti, të kërkohet para gjykatës, që përveç dënimeve kryesore, të caktohen edhe dënime plotësuese”, thuhet

në material. 

TË DHËNA:

15338 – numri i kallëzimeve të regjistruara përgjatë 2014.

14229 kallëzime – referuar nga Policia e Shtetit

263 kallëzime – referuar nga nëpunësit publikë

15 referime të ardhura nga Kontrolli Lartë i Shtetit, nga këto në 12 raste është vendosur regjistrimi i procedimeve penale dhe dy janë në fazë verifikimi.

33 kallëzime penale – referuar nga ILDKP (janë regjistruar 25 procedime, janë mosfilluar 7 referime dhe një material është në shqyrtim).

3604 procedime janë dërguar për gjykim – me 4270 persona të pandehur, nga të cilët:

1203 me masë sigurimi arrest dhe 3067 në gjendje të lirë.

730 procedime penale – referuar nga policia në bashkëpunim me OSHEE-sha., për vjedhje të energjisë elektrike.

 

(m.k/GazetaShqiptare/BalkanWeb)