Agjencia ndërkombëtare Euromoney rriti sot vlerësimin e ekspertëve të saj për Shqipërinë, pasi vendi po ecën përpara në rrugën drejt anëtarësimit në Bashkimin Europian.
Katër vjet që kur Shqipëria u bë një kandidat për bisedimet e pranimit në BE, vendi po bën gjithçka që mundet për të mundwsuar fillimin e negociatave, me synimin për t’u bashkuar në vitin 2025. Qeveria e Kryeministrit Edi Rama më në fund po zbaton reformat gjyqësore të kërkuara për fillimin e këtyre diskutimeve, verifikimin e gjyqtarëve, oficerëve të policisë dhe zyrtarëve të burgjeve dhe shkarkimin e atyre që refuzojnë ndërhyrjen që synon të vendosë kompetencën dhe integritetin e tyre. Si pasojë, po shtohen spekulimet se procesi i negocimit të BE do të nisë më në fund këtë qershor, një zhvillim që ka gjasa të mbështesë ecurinë e Shqipërisë së bashku me vendet e tjera në rajon, që synojnë në mënyrë të ngjashme integrimin.
Shqipëria, sipas ekspertëve të vlerësimit të Euromoney ka marrë 38 pikë, nga 100 që është maksimumi, dhe ende konsiderohet një huamarrës me rrezik të lartë në katër nga pesë kategoritë e rrezikut të Euromoney. Megjithatë, pikët dhe renditja janë përmirësuar, duke bërë që Shqipëria të ngjitet në vendin e 89, nga 186 vende në renditje, duke ia kaluar Maqedonisë –që tashmë është dy vende më poshtë – dhe malit të zi (112), ndërsa Serbia është në vend të 75.
Shqipëria do të kishte marrë vlerësim më të lartë, nëse nuk do të ishte shqetësimi për nivelin e lartë të kredive me probleme në sistemin bankar, një klimë jo shumë e mirë për investitorët dhe barrën e lartë të borxhit publik.
Barra e borxhit ndikohet nga detyrimet e lidhura me partneritetet publike-private dhe me disa detyrime të prapambetura.
Raporti paralajmëron se perspektiva afatshkurtër do të ndikohet negativisht nga mbarimi i projekteve të mëdha të energjisë, që do të ndikojnë në ngadalësimin e rritjes ekonomike, ndërsa vendi është i ndikueshëm nga disa skenarë negativë si kriza financiare e politike dhe efektet e luftës tregtare ndërkombëtare. Gjithsesi, thekson raporti, në afat të gjatë nuk ka të ngjarë që rritja të ndalet./monitor/
(BalkanWeb)
