Ka përfunduar sot aventura e bardhekaltërve të Lacios në Europa League. Sevilja ka fituar dhe ndeshjen e dytë në Spanjë, duke detyruar Lacion që të bëjë valixhet dhe të kthehet në shtëpi kokulur.
Nuk ka mundur dot të bëjë asnjë gardiani kuqezi i portës laciale, Tomas Strakosha, me vendësit që kanë kërkuar dhe shënuar 2 gola, duke qenë dukshëm më superiorë sesa kundërshtari.
Në minutën e 20-të Bin Jeder shënoi golin e avantazhit për të zotët e shtëpisë, që fitojnë shumë edhe në aspektin psikologjik ndaj rivalit, që tashmë duhet të shënojë dy herë. Por ata që shënojnë janë sërish lojtarët e Seviljes, kësaj radhe në minutën e 78-të me Sarabian, që vulos çdo gjë dhe i jep Seviljes biletën e kualifikimit për në turin tjetër.