Pavarësisht se ishte i treti më i votuar në Primare, u la në listë të hapur në qarkun e Tiranës, por Alimehmeti ka bindjen e plotë se PD do të marrë mandate përtej listës së mbyllur. Kandidati demokrat në qarkun e Tiranës thotë për gazetën “Panorama” se PD-ja është alternativa më e mirë dhe, nëse nuk janë zgjedhje të lira, humbasim të gjithë, çdo qytetar, pavarësisht animit politik. Kreu i grupit të këshilltarëve demokratë në Bashkinë e Tiranës flet edhe për vendimin e papritur me firmën e zv/kryeministres Belinda Balluku për ndërtimin e fabrikës së armëve në ishUzinën e Autotraktorëve.
Ilir Alimehmeti denoncoi shmangien e Këshillit Bashkiak në kundërshtim me ligjin. Pas kërkesës së PD-së, Këshilli bashkiak do të mblidhet me datën 3 prill, por sipas Alimehmetit nuk kanë futur në diskutim në rendin e ditës as çështjen e shqyrtimit të krizës së bashkisë pas arrestimit të Veliajt dhe as çështjen e fabrikës së armëve.
Z.Alimehmeti! Çfarë po e tensionon situatën politike në prag të zgjedhjeve parlamentare të 11 majit?
Patjetër dy janë faktorët kyç. Faktori i parë është mungesa e ofertës së Partisë Socialiste, e cila ka mbetur te premtimet e pambajtura të 2013 që po i ripërsërit sërish, pa kuptuar dot nëse flet për Shqipërinë e 2030-ës apo për Shqipërinë e 2013-ës. Faktori i dytë është abuzimi mastodontik me fondet publike në të gjitha nivelet qendrore dhe vendore që kulmoi në shkurt me arrestimin e kryetarit të Bashkisë Tiranë, Erion Veliaj. Ky arrestim de facto gjymtoi makinën elektorale të PS-së në Tiranë, duke detyruar Kryeministrin të kryejë aktin antikushtetues të paprecendtë, kapjen e Bashkisë së Tiranës, nga njëri krah pa shkarkuar Erion Veliajn e nga krahu tjetër pa gjetur zgjidhje dhe papërcaktuar juridikisht kush është zëvendësuesi i tij. Fraktura e shkaktuar është e pariparueshme. Të dy faktorët kyç janë, në fakt, brenda krizës së PS-së.
Pjesë e garës elektorale jeni edhe ju, ku pavarësisht se i treti më i votuar në Primaret e PD-së, u latë në listë të hapur në qarkun e Tiranës. A besoni se PD do të marrë mandate përtej listës së mbyllur?
Absolutisht po. Jam i bindur për këtë.
A varet e ardhmja e vendit nga dita e zgjedhjeve?
Patjetër që po. Zgjedhjet përcaktojnë cilin drejtim do të marrë Shqipëria në katër vitet e ardhshme. Do të vazhdojë shpopullimi i Shqipërisë apo do të rikthehet shpresa dhe dinjiteti e do të nisë rimëkëmbja e familjes dhe e kombit.
Arrestimet e zyrtarëve të lartë të PS-së deri te kryebashkiaku i Tiranës Erion Veliaj, sa e kanë dobësuar politikisht mazhorancën aktuale?
Në Tiranë është dobësuar maksimalisht dhe kjo është e dukshme me sy të lirë. Mjafton të shohësh mungesën e zyrave elektorale të PS-së, të cilat dy vite më parë ishin të hapura në çdo cep që përpara 5-6 muajve nga zgjedhjet vendore. Fraktura është e thellë dhe mazhoranca aktualisht ndodhet në një lojë “macja me miun” brenda vetes, lojë e detyruar edhe nga reforma zgjedhore gjysmake që kanë hartuar po vetë.
A do ta shohim Ilir Alimehmetin në Kuvendin e ardhshëm? A do jeni ju një “ilaç” për PD-në?
Me besimin dhe mbështetjen e njerëzve kam bindjen se do të jem pjesë e Kuvendit 2025-2029, por në radhë të parë duhet të mendojmë Shqipërinë e më pas partinë. Shqipëria lëngon nga politika që minimalisht nuk mbështesin familjen dhe maksimalisht janë antifamiljare, si ligjet “prindi 1 dhe prindi 2”, “shtatzënia surrogate”, etj. Duke shëruar plagën që i është shkaktuar familjes mund të shërojmë edhe plagë më të mëdha të Shqipërisë, si shpopullimi masiv i këtyre viteve. Nëse shërohet terreni, pra Shqipëria, çdo produkt i saj, përfshirë PD-në, do të mund të rritet më i shëndetshëm.
Çfarë ndodh nëse PS i fiton sërish zgjedhjet?
Pyetja e duhur është: “A do të jenë të lira dhe të ndershme zgjedhjet?”. Nëse zgjedhjet janë të lira e të ndershme, fitoftë më i miri dhe unë mendoj se PD-ja është alternativa më e mirë. Opozita, cilado qoftë në këtë rast, mbetet aset kombëtar nëse trajtohet drejtësisht sipas Kushtetutës dhe ligjit. Nëse nuk janë zgjedhje të lira e të ndershme, humbasim të gjithë, çdo qytetar, pavarësisht animit politik.
Para pak ditësh grupi i këshilltarëve të PD-së në Bashkinë e Tiranës i dërgoi një letër Kongresit të Autoriteteve Lokale në Këshillin e Europës, ku akuzonte kryeministrin Edi Rama se ka cenuar pavarësinë e pushtetit vendor me ndërhyrjet në Bashkinë e Tiranës. Çfarë shkeljesh keni konstatuar?
Siç shkruhet në shkresë: Pas vendimit të gjykatës për arrestimin e Kryetarit të Bashkisë Tiranë, z. Erion Veliaj, kemi vërejtur një ndërhyrje të paprecedentë dhe të paligjshme nga ana e Kryeministrit të Shqipërisë, z. Edi Rama, në punët administrative dhe vendimmarrjen e Bashkisë Tiranë. Në vend që Këshilli Bashkiak dhe institucionet e qeverisjes vendore të ushtrojnë funksionet e tyre në përputhje me Kushtetutën dhe ligjin, bashkia është vënë nën kontrollin e drejtpërdrejtë të ekzekutivit qendror. Në këtë kontekst, vërejmë: 1.Cënimin e autonomisë vendore – Neni 3 i Kartës Evropiane të Autonomisë Vendore përcakton qartë se autoritetet vendore duhet të jenë të lira nga ndërhyrjet e paligjshme të qeverisë qendrore. Megjithatë, veprimet e Kryeministrit tregojnë një kapje politike të institucioneve vendore. 2.Margjinalizimin e Këshillit Bashkiak – Pavarësisht se Këshilli Bashkiak është organi më i lartë përfaqësues në nivel vendor, ai është anashkaluar dhe nuk po ushtrohet roli i tij kushtetues dhe ligjor.
Manipulimin politik të administratës dhe burimeve publike – Ka shenja të qarta se ky kontroll i paligjshëm mbi Bashkinë Tiranë po përdoret për përfitime politike dhe ekonomike, duke përfshirë dhënien e lejeve të ndërtimit në mënyrë të dyshimtë dhe instrumentalizimin e administratës për zgjedhjet parlamentare të 11 majit 2024.
Sa të vërteta janë pretendimet e PD-së se ka shenja të qarta se administrata e Bashkisë Tiranë po manipulohet dhe kërcënohet për t’u përdorur në zgjedhjet e datës 11 maj?
Gjithkush që njeh jetën shoqërore dhe politike në Tiranë besoj mund ta konfirmojë menjëherë vetë këtë zallamahi përmes cilitdo kontakt që ka të lidhur me Bashkinë apo me administratën.
Me firmën e zëvendëskryeministres Belinda Balluku, qeveria miratoi më 12 mars 2025 një vendim që i kalon shoqërisë shtetërore KAYO pronësinë e godinave të ish-Uzinës së Autotraktorëve, të cilat ndodhen në zonën e Shkozës. Bazuar mbi ligjin e “Vetëqeverisjes vendore” të vitit 2015, të miratuar nga vetë qeveria Rama, i vetmi organ që mund të trajtojë pronat në pronësi të Bashkisë Tiranë është Këshilli Bashkiak. Pse u shmang Këshilli Bashkiak dhe pse pikërisht tani që z.Veliaj qëndron në burg?
Më datë 12.03.2025, Këshilli i Ministrave ka marrë vendimin për “Revokimin e së drejtës së pronësisë Bashkisë së Tiranës dhe transferimin e pronësisë te shoqëria shtetërore “KAYO”, SH.A., të pasurive, pjesë të pronës nr.16, me emërtimin “ish-uzina e pjesëve të ndërrimit të automjeteve”, me vendndodhje në zonën kadastrale 8170, TIRANË”.
Kjo VKM është në shkelje të plotë të Ligjit Nr. 139/2015 “Për Vetëqeverisjen Vendore”, të ndryshuar, dhe të Rregullores për organizimin dhe funksionimin e Këshillit Bashkiak Tiranë, në të cilat citohet: Ligji Nr. 139/2015, Neni 54, shkronja e, “Këshilli bashkiak miraton tjetërsimin ose dhënien në përdorim të pronave të tretëve”; Rregullorja për organizimin dhe funksionimin e Këshillit Bashkiak Tiranë, Neni 58, pika 6 “Vendimet merren me jo më pak se tre të pestat e numrit të përgjithshëm të anëtarëve të këshillit për rastin e parashikuar në shkronjën “e”, të nenit 54, të ligjit “Për vetëqeverisjen vendore”.
Unë personalisht kam kërkuar përmes shkresës nr. 12317 Prot. të datës 28 mars 2025 futjen në rend dite në mbledhjen më të parë të Këshillit Bashkiak të trajtimit të çështjes së revokimit nga Këshillimi i Ministrave të së drejtës së pronësisë të Bashkisë Tiranë që bie në kundërshtim të plotë me legjislacionin në fuqi. Gjithashtu, pronat e ndodhura në Njësinë Administrative nr. 1 Tiranë janë kaluar në pronësi që 8 vite më parë, përmes VKM nr. 219, datë 21.03.2017, për t’u përdorur për realizimin e veprimtarive social-kulturore e sportive dhe për realizimin e programeve arsimore. Kemi kërkuar informacion pse në këtë zonë nuk janë realizuar programet arsimore, socialkulturore e sportive të përcaktuara më lart.
Kur do të mblidhet Këshilli Bashkiak i Tiranës?
Këshilli Bashkiak sapo është njoftuar se do të mblidhet më datë 3 prill 2025, por nuk kanë futur në diskutim në rendin e ditës as çështjen e shqyrtimit të krizës së bashkisë pas arrestimit të Veliajt dhe as çështjen e mësipërme të fabrikës së armëve.
PD e denoncoi vendimin e zj.Balluku duke paralajmëruar se dosjen do ta çojë në SPAK. Çfarë fshihet pas këtij vendimi dhe sa e rrezikuar është jeta e qytetarëve me këtë vendim?
Kjo pronësi i është kaluar Bashkisë Tiranë me VKM 219 që më 21 mars 2017, tetë vjet më parë për përdorim për realizimin e programeve arsimore dhe për realizimin e veprimtarive social-kulturore e sportive. Në tetë vite nuk është kryer asgjë. Asnjë objekt arsimor! Asnjë veprimtari sociale! Asnjë veprimtari kulturore! Asnjë veprimtari sportiv! Për qëllime ushtarake, ka mjaftueshëm objekte dhe terrene që mund të përdoren e që ndodhen në zona më të përshtatshme po brenda territorit të Bashkisë Tiranë. Por pranë njerëzve dhe në zonat e banuara është e nevojshme të ndërtojmë çerdhe, kopshte, shkolla, objekte sociale dhe fusha sportive në mbështetje të tyre dhe familjeve të tyre.
Si mund të zhbëhet vendimi i znj.Balluku për fabrikën e prodhimit të armëve?
Ka shumë forma të ndryshme, por baza mbetet që ky vendim është uzurpim i pushtetit vendor dhe në këtë aspekt është nul nga pikëpamja ligjore./Gazeta Panorama
