Një raport hetimor i publikuar së fundmi ka pohuar se FBI-ja ka rishikuar në heshtje statistikat e saj të krimit të dhunshëm të vitit 2022, në një lëvizje që mund të ketë pasoja politike në prag të zgjedhjeve të ardhshme në SHBA, transmeton Anadolu.
Sipas raportit të publikuar dje nga “RealClearInvestigations”, FBI-ja dyshohet se përditësoi të dhënat e saj për të treguar rritje prej 4.5 për qind të krimit të dhunshëm për vitin 2022, duke ndryshuar raportin e saj fillestar për rënie prej 2.1 për qind.
Raporti thotë se FBI-ja i bëri këto rishikime pa njoftim apo shpjegim publik, duke pretenduar se ndryshimet u zbuluan përmes një referimi në faqen e internetit të organizatës.
Sipas raportit, krahasuar me raportin fillestar, mijëra vrasje të tjera, përdhunime, grabitje dhe sulme të rënda dyshohet se u përfshinë në të dhënat e rishikuara. Raporti po ashtu thekson se ndryshimi mund të ndikojë në narrativat politike demokratike rreth shkallës së krimit.
Kur shifrat u publikuan për herë të parë vitin e kaluar, tha raporti, ajo “shpejt u bë dhe mbetet një pikë bisede e Partisë Demokratike për të kundërshtuar pretendimet e Donald Trumpit për krimin në rritje”.
Raporti përmendi edhe shqetësimet e studiuesve për mungesën e shpjegimit për këto rishikime të supozuara.
“RealClearInvestigations” tha se FBI-ja nuk iu përgjigj kërkesave për koment mbi pretendimet. Kandidati republikan dhe fushata e ish-presidentit Trump ndau raportin.
