Pas pesë ndeshjesh pa humbje mes kampionatit dhe Kupës së Shqipërisë, Tirana i jep fund serisë pozitive në tranfertën kundër Kastriotit në javën e 25-të të Superligës. Një 11-metërsh i dyshimtë në minutën e 27-të të pjesës së parë vendosi fatin e sfidës dhe i dhuroi krutanëve tri pikë të arta në misionin e tyre për të qëndruar në elitën e futbollit shqiptar. Ndeshja nisi e fortë dhe tensioni ishte i pari që mori skenën, pas përplasjes së Ngo dhe Ymeraj. Pas qetësimit të dy lojtarëve ndeshja vijojë pa shumë raste, ndërsa për të zhbllokuar rezultatin duhet një vendim i kryesorit Sokoli, që akordoi një 11-metërsh për vendasit.
Në tentativë për të larguar topin Maveje, goditi edhe një kundërshtar, ndërsa për arbitrin kaq mjafton për të dhënë penallti. Goditjen e mori përsipër Marku, që ndali topin në rrjetë, për të vendosur edhe pjesën e parë. Me rikthimin në fushë, rastet nuk sollën asnjë ndryshim në shifra, ndërsa bardheblutë kishin kundër edhe fatin në minutën e 80-të, kur thembra e Halilit u ndal vetëm nga shtylla. Në fund e gjithë festa ishte për Kastriotin, tashmë me më shumë shpresa për të shpëtuar. I ndryshëm diskutimi për Tiranën, që me këtë ndalesë të fortë nuk arrin të shkëputet nga gara e skuadrave që luajnë për mbijetesë. Nuk kishte fitues në sfidën tjetër direkte për Europën, pasi Laçi dhe Flamurtari u ndanë në barazim pa gola.
(balkanweb)