TIRANE- Gjashtë deputetë të Partisë Demokratike që sot janë regjistruar si deputetë të Partisë Republikane në Kuvend. Kjo lëvizje është një pakt mes kryetarit të PD-së dhe aleatit të tij më të vogël, Fatmir Mediu që edhe PR-ja të mund të krijojë grupin e saj parlamentar.
Gazetarja Elda Menga bën me dije për BalkanWeb se Lulzim Basha i ka dhënë borxh Fatmir Mediut, deputetët Lindita Metaliaj, Nadire Meçorapaj, Hekuran Hoxhalli, Fatbardha Kadiu, Orjola Pampuri dhe Isuf Çelaj.
Sipas rregullores duhen 7 deputetë që të krijohet një grupim parlamentar dhe Mediu tashmë e plotëson këtë kusht.
Kryetari Fatmir Mediu mësohet të ketë regjistruar në Kuvned grupin më të ri, ku kryetar është vetë, nënkryetare ka zgjedhur Lindita Metaliajn, ndërsa deputetët e tjerë janë anëtarë.
Edhe legjislaturën e shkuar PD ndihmoi aleatin historik PR duke iu dhënë deputetë në mënyrë që të mund të krijonte grupin e saj parlamentar. Krijimi i një grupi u jep mundësi partive të vogla të kenë një këshilltar dhe një sekretare, ndërkohë që paga e kryetarit të grupit është 5% më e lartë se e deputetit. Krijimi i një grupi i jep mundësi kreut të partisë të jetë pjesë e strukturave vendimmarrëse në parlament, siç është Konferenca e Kryetarëve.
(m.a/BalkanWeb)