SHBA – FBI-ja në SHBA po heton çdo detaj të jetës së Esteban Santiago, personi i cili ditën e djeshme vrau pesë persona dhe plagosi tetë të tjerë në aeroportin “Fort Lauderdale” të Floridas.

Edhe pse ditën e djeshme media të ndryshme amerikane deklaruan se 26-vjecari ishte një person me probleme mendore, kreu i FBI-së në Majemi George Piro nuk përjashtoi terrorizmin.

“Nuk përjashtojmë asgjë, as terrorizmin. Po hetojmë me imtësi për të përcaktuar motivet e këtij sulmi”- deklaroi ai në konferencën për shtypin, që u mbajt menjëherë pas ngjarjes së tmerrshme në aeroport.

Esteban Santiago me origjinë portorikane do të dalë përpara gjykatës së BroWard County ditën e hënë.
esteban-780x439
FBI konfirmon se ky person ka probleme mendore dhe mendohet se ka thënë më parë këto fjalë në nëntor te 2016-ës: “Qeveria më kontrollon mendjen dhe më bën të shoh video xhihadiste”.

Ai është një ish-ushtarak, i cili ka shërbyer në Irak për rreth një vit, nga periudha 23 prill 2010 deri në 19 shkurt 2011 dhe gjithashtu kishte marr dhe medalje nderi. Sipas mediave amerikane i riu ishte kthyer nga Iraku me probleme psikike dhe më pas ishte transferuar në Alaska me partneren dhe djalin e tyre 4 vjec.

Ndërkohë vëllai i tij, Bryan Santiago gjithashtu konfirmoi se Esteban i ishte nënshtruar një sërë kurash psikike menjëherë sapo ishte kthyer nga Iraku.

Sipas policisë amerikane, 26-vjeçari pasi ka marrë çantën, ku kishte armën ka shkuar në tualet dhe e ka mbushur atë. Pas këtij momenti ai ka dalë dhe ka qëlluar ndaj personave të tjerë. I riu ka debatuar me pasagjerët e tjerë gjatë fluturimit para se të merrte armën dhe të qëllonte ndaj kujtdo që i dilte përpara.

(er.cu/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: