UKRAINE

Një ushtar ukrainas ka treguar se ka humbur 40 kilogramë pas më shumë se 1,000 ditësh i mbajtur si rob lufte në burgjet ruse. 30-vjeçari Ivan Petrovsky u kap nga forcat ruse në maj të vitit 2022, gjatë mbrojtjes së Mariupolit.

Ai u lirua kohët e fundit si pjesë e një shkëmbimi të të burgosurve dhe ndau përvojën e tij të vështirë.

“Jam më në fund në shtëpi! Diferenca është 1,037 ditë në robëri dhe 40 kilogramë më pak,” shkroi ai.

Në shtëpi e priste gruaja e tij, Kristina Petrovska, së bashku me dy vajzat e tyre. Sipas rrëfimeve të tij, kushtet në kampet ruse ishin çnjerëzore.

Në disa nga këto kampe, racionet e ushqimit përfshinin vetëm disa lugë qull, gjysmë filxhani çaji dhe dy feta të holla buke në ditë.

Ish-robërit ukrainas kanë raportuar për trajtim mizor, përfshirë tortura, rrahje të vazhdueshme dhe goditje elektrike në qendrat e paraburgimit në Rusinë jugperëndimore.
Ata janë përballur gjithashtu me abuzime fizike dhe psikologjike nga rojet dhe oficerët rusë.

Mediat kanë publikuar pamje tronditëse nga brenda kampeve, ku persona me aftësi të kufizuara dhe të moshuar mbaheshin të lidhur me zinxhirë, përpara se të dërgoheshin drejt vijës së frontit në Ukrainë.