TIRANE
Tre orë zgjati protesta e sotme e demokratëve përpara Parlamentit, për tu zhvendosur më pas tek Kryesia e Kuvendit aty ku shumica e opozitarëve dorëzuan mandatet e deputetëve për të qënë nga sot qytetarë të lirë.
Nuk ka ndodhur ndonjëherë në historinë e pluralizëm që në Parlament të mos ketë opozitë, por viti 2019-të mund të shënohet i tillë. Për herë të parë në demokraci, opozita vendos t’ja kthejë mandatet popullit duke lënë bosh vendet në Parlament.
Opozitarët kanë pasur mbështetje popullore, siç duket edhe në fotot e siguruara nga LSA-ja për të vazhduar me vendimin e tyre. Nga ana tjetër askush prej ndërkombëtarëve dhe selive diplomatike në Shqipëri nuk i ka mbështetur.
Ndryshe nga protesta e 16 shkurtit, protesta e zhvilluar sot para Parlamentit nuk qe e dhunshme, ndonëse garda dhe policia siç mund t’i shihni në foto kanë marrë masa maksimale për të parandaluar çdo rast të mundshëm.
Megjithatë kjo nuk është protesta e fundit. Siç deklaroi edhe Lulzim Basha protesta të vazhdueshme do të ketë edhe në rrethe, kudo ku qytetarët nuk pajtohen me qeverinë, që siç e quajnë opozitarët është kthyer tashmë në një regjim.