TIRANË
Pas shtrimit të iftarit nga kryeministri Edi Rama për besimtarët myslimanë në “Natën e Kadrit” dhe mesazhet dërguar opozitës, ka ardhur edhe reagimi i parë nga Partia Demokratike.
Ka qenë ish-deputeti Gent Strazimiri, i cili ka publikuar një foto, ku sipas tij shfaqet kryeministri Edi Rama duke ecur në shtrojë përpara xhamisë ku po faleshin besimtarët. Ai e quan kryeministrin si një njeri të pa fe dhe pa atdhe.
“Natën e Kadrit përmenden Sure nga Kur’ani, jo helm nga “Kurbani”, o halabak pa fe’ e pa atdhe!!!”-shkruan ai.
Kjo përgjigje ka ardhur menjëherë pas apelit që kishte kreu i qeverisë Edi Rama për opozitën e bashkuar, të cilën e ftoi të mos largohet nga rruga e arsyes duke i kujtuar se qeveria i ka veshët e hapur dhe është gati për të dëgjuar edhe pretendimet e saj.