Shkollat në të gjithë Serbinë do të mbyllen 1 javë para fillimit të pushimeve dimërore. Vendimi është marrë nga Qeveria e Presidentit nacionalist, Aleksandar Vuçiç, i cili kërkon të ndalojë protestat kundër korrupsionit që kanë përfshirë universitetet dhe i druhet përhapjes së tyre në arsimin e mesëm.
Ministrja e Arsimit, Slavica Đukić Dejanović, njoftoi të premten se shkollat fillore dhe të mesme në të gjithë vendin do të mbyllen nga e marta, dhe jo nga e hëna 30 dhjetor, duke përmendur shqetësimet për sigurinë dhe cilësinë e arsimit të fëmijëve në mes të valës së protestave.
Shumica e popullsisë së Serbisë janë anëtarë të kishës ortodokse, e cila ndjek kalendarin julian dhe Krishtlindja festohet zyrtarisht më 7 janar dhe jo më 24 ose 25 dhjetor.
Më herët të premten, mësuesit nga katër sindikatat e arsimit njoftuan se do të hynin në grevë në shenjë solidariteti me studentët që protestojnë prej nëntorit.
Më 1 nëntor, 14 njerëz të moshës nga gjashtë deri në 74 vjeç humbën jetën kur mbulesa prej betoni e stacionit kryesor hekurudhor në Novi Sad, Serbinë veriore, u shemb vetëm disa muaj pas përfundimit të një rikonstruksioni të stacionit. Një person i 15-të vdiq më vonë në spital.
Qeveria nxitoi të justifikonte se mbulesa e rënë nuk kishte qenë pjesë e rikonstruksionit, por fotot që dolën pas aksidentit duket se tregonin tonelata xhami dhe hekuri që ishin shtuar si pjesë e projektit.
Në demonstratat në Novi Sad dhe Beograd, protestuesit i kërkuan qeverisë të merrte përgjegjësinë, duke pretenduar se aksidenti ishte rezultat i një sistemi që shpërblente besnikërinë ndaj Partisë Progresive Serbe të Vuçiçit.
“Nëse bën diçka të gabuar, duhet të ndëshkohesh”, tha për Guardian Vanja Sheviç, një studente 22-vjeçare në Fakultetin e Arteve Dramatike në Beograd.
“Megjithatë askush nuk është mbajtur përgjegjës siç duhet. Ne duam që protestat të vazhdojnë deri në vendosjen e drejtësisë”, tha ajo.
Të premteve gjatë gjithë nëntorit dhe dhjetorit, studentët në të gjithë Serbinë kanë organizuar bllokada 15-minutëshe të Universitetit në orën 11.52, duke iu referuar numrit të viktimave dhe kohës së shembjes së tendës.
Reagimet e ashpra të Policisë shkaktuan zemërim në mesin e protestuesve studentorë. Më 22 nëntor, disa studentë dhe personel mësimdhënës në një bllokim rruge jashtë Fakultetit të Arteve Dramatike u sulmuan verbalisht dhe fizikisht nga njerëz që dukej se ishin shoferë të zemëruar, disa prej të cilëve rezultuan se mbanin funksione zyrtare.
