Ishte njeriu i mbrëmjes në Champions. Nuk kishte si të ndodhte ndryshe dhe pasi udhëhoqi Juventusin drejt triumfit, Kristiano Ronaldo ka pushtuar faqet e para të mediave ndërkombëtare, sportive dhe jo vetëm. Nga “legjendë”, te “fenomenal”, madje edhe “marsian”, janë këto disa prej epiteteve që shoqërojnë fotot e mëdha të CR7 në të përditëshmet italine. Ato i thurin elozhe paraqitjes personale të sulmuesit portugez, por edhe Juventusit si skuadër në fitoren e madhe 3-0 kundër Atletiko Madrid. Po ashtu, mediat përtej Adriatikut shprehen se si me tre golat e tij, Ronaldo shpërbleu brenda një nate investimin e çmendur të “Zonjës së Vjetër” për të blerë kartonin e tij nga Reali Madridit.
Jo vetëm në Itali. Kristiano Ronaldo është “heroi” io faqeve të para edhe në mediat spanjolle, franceze dhe sigurisht portugeze.
Një atmosferë triumfi shpërndajnë edhe të përditëshmet angleze, që nuk e kanë harruar CR7, por gjithsesi fjalët më të mira i kanë për Pep Guardiolën dhe futbollistët e tij, pas asaj fitore të ekzagjeruar 7-0 kundër Schalke 04.
Sipas tyre, Mançester Siti tregoi edhe një herë se është një nga favoritët kryesorë për të fituar Champions.
(balkanweb)
