Giorgio Armani, themeluesi 90-vjeçar i perandorisë italiane të modës, tha sot se planifikon të tërhiqet pas dy deri në tre vjet.

Armani deri më tani nuk ka folur se kush do të trashëgojë kompaninë që ai themeloi në 1975 dhe ende e kontrollon me vendosmëri, raporton Reuters.

“Mund t’i jap vetes edhe dy ose tre vjet në krye të kompanisë. Jo më shumë se kaq, kjo do të ishte negative,” tha ai në një intervistë për gazetën Corriere della Sera.

Krijuesi i famshëm shtoi se natën ëndërron për një të ardhme në të cilën nuk do të duhet të jetë më ai që thotë “po” apo “jo”.

Armani tha se deri më tani ka marrë disa oferta nga investitorë potencialë për kompaninë e tij, por se aktualisht nuk e sheh kandidatin e duhur.

Pa fëmijë për të trashëguar kompaninë e tij, ka pasur spekulime për të ardhmen e perandorisë së modës të Armani dhe pyetje nëse ai do të jetë në gjendje të ruajë pavarësinë e tij në një industri të dominuar nga konglomerate luksoze si LVMH dhe Kering.

Lidhur me këtë, Armani tha se kishte ndërtuar “një lloj strukture, projekti dhe protokolli” për të menaxhuar çështjen e trashëgimisë së kompanisë, por nuk dha detaje.