Zjarrfikësit grekë kanë nisur luftën e tyre me zjarret prej javësh tashmë, teksa së fundmi flakët kanë prekur ishujt lindorë të Egjeut, Chios dhe Kos.

Zjarret plagosën pesë persona, ndërsa kryeministri i Greqisë ka paralajmëruar për një verë të rrezikshme duke thënë se ndihma e qytetarëve do të jetë thelbësore për të kufizuar ndikimin e zjarreve.

Shërbimet e urgjencës lëshuan urdhra evakuimi për banorët në zonën Metohi të Chiosit perëndimor të hënën në mëngjes, duke i nxitur ata të shkojnë në një plazh aty pranë. Deri në mbrëmje, më shumë se 140 zjarrfikës, së bashku me tetë ekipe zjarrfikësish të specializuar për zjarret , shtatë avionë që hidhnin ujë dhe tre helikopterë po luftonin zjarrin.

Zëdhënësi i departamentit të zjarrfikësve Vasilis Vathrakoyiannis tha se dy zjarrfikës ishin plagosur lehtë, ndërsa dhjetëra të tjerë po shkonin në ishull me varkë nga ishulli i afërt Lesbos dhe nga Athina.

Televizioni shtetëror ERT raportoi më vonë se dy zjarrfikës të tjerë dhe një vullnetar kishin pësuar djegie jo të rrezikshme për jetën.

Në total, Greqia është përballur me 52 zjarre që shpërthyen në periudhën e mëparshme 24-orëshe, 44 prej të cilave u trajtuan në fazat e hershme, tha Vathrakoyiannis. Autoritetet ishin ende duke luftuar me gjithsej tetë zjarre deri të hënën në mbrëmje.

Zjarret vijnë një ditë pasi departamenti i zjarrfikësve arriti të zbusë dy zjarre të mëdha pyjore pranë Athinës që ishin ndezur nga erërat e forta.

“Kemi pasur një qershor jashtëzakonisht të vështirë përsa i përket kushteve të motit, me nivele të larta thatësire dhe erëra jashtëzakonisht të forta për këtë sezon,” tha kryeministri Kyriakos Mitsotakis të hënën gjatë një takimi të kabinetit.

Vera e këtij viti, tha ai, “parashikohet të jetë veçanërisht e rrezikshme” për zjarret.

Mitsotakis tha se përdorimi i dronëve si pjesë e një sistemi të paralajmërimit të hershëm për zjarret kishte qenë veçanërisht i dobishëm këtë vit dhe vlerësoi një koordinim më të mirë midis autoriteteve dhe zjarrfikësve vullnetarë për kufizimin e shkallës së dëmtimit të zjarrit deri më tani.

“Ne po hyjmë në thelbin e ashpër të periudhës kundër zjarrit dhe kjo sigurisht që nuk do të fitohet pa ndihmën e publikut gjithashtu, veçanërisht në aspektin e parandalimit,” tha Mitsotakis.

Moti i nxehtë dhe i thatë i kombinuar me erërat e forta ndihmuan në nxitjen e zjarreve në Greqi dhe Turqi muajin e kaluar. Vera e këtij viti pritet të jetë veçanërisht e prirur ndaj flakëve pas një dimri të butë dhe të thatë.

Evropa është kontinenti me ngrohjen më të shpejtë , sipas një raporti të fundit nga Organizata Botërore Meteorologjike e OKB-së dhe agjencia e klimës e Bashkimit Evropian, Copernicus. Në verë, ngrohja fokusohet në Evropën qendrore dhe juglindore dhe rreth Mesdheut.