Ndërsa veshja e gruas së Mirditës u shpall së fundmi Kryevlerë Kombëtare e Trashëgimisë Kulturore, Mrika, një grua e moshuar nga Kaçinari i Mirditës, mirëmban në shtëpinë e saj, në një zonë të thellë, veshje mirditore 200-vjeçare. Ndonëse është shpërngulur në Durrës, ajo kthehet herë pas herë për t’u kujdesur për veshjet e trashëguara, të cilat në mungesë të një muzeu, duhet t’i mbajë në shtëpi.

Veshjet e gruas mirditore qenë pjesë e ekspozitës, së çelur në “Shtëpinë e Europës” në Tiranë, “Mirdita në fotografi”. Ekspozita shfaq punime në mediumin e fotografisë ku Nadia Abazi ka fiksuar imazhe të kullave. Një hapësirë më vete i kushtohet në ekspozitë vendit të kujtesës kolektive të burgut kamp të Spaçit, me videoinstalacionin e titulluar “Saharaja” të artistes ndërdisipilonore, Abi Shehu.

Ekspozita mbi Mirditën e mbështetur nga “Eu for Culture”, shfaq edhe punime artizanale e tradicionale të zonës, ndërsa në hapje, morën pjesë figura të kulturës e politikës së zonës dhe diplomatë nga delegacioni i Bashkimit Europian në Tiranë.