Hamasi ka rënë dakord për një rezolutë të Këshillit të Sigurimit të OKB-së që bën thirrje për një armëpushim në Gaza, tha grupi militant palestinez në mbrëmje.
Këshilli miratoi rezolutën e mbështetur nga SHBA me 14 vota pro dhe Rusia abstenoi. Uashingtoni kishte finalizuar tekstin e draftit të dielën.
“Hamasi mirëpret atë që përfshihet në rezolutën e Këshillit të Sigurimit që pohoi armëpushimin e përhershëm në Gaza, tërheqjen e plotë, shkëmbimin e të burgosurve, rindërtimin, kthimin e të zhvendosurve në zonat e tyre të banimit, refuzimin e çdo ndryshimi demografik apo reduktim në zonën e Rripit të Gazës dhe shpërndarjen e ndihmave të nevojshme për njerëzit tanë në Rrip”, tha grupi në një deklaratë të cituar nga Reuters.
Hamasi tha gjithashtu se do të ishte i gatshëm të merrte pjesë në negociatat indirekte me Izraelin mbi zbatimin e parimeve “që janë në përputhje me kërkesat e popullit tonë dhe rezistencës”.
Sipas Shtëpisë së Bardhë, Izraeli e ka pranuar tashmë propozimin e armëpushimit. Presidenti i SHBA Joe Biden ka pohuar se plani trefazor ishte një ide izraelite në fillim.
Rezoluta e OKB-së u bën thirrje të dyja palëve “të zbatojnë plotësisht kushtet e saj pa vonesë dhe pa kushte”.
Faza e parë e propozimit përfshin një “pauzë” gjashtë-javore në luftime, gjatë së cilës Izraeli dhe Hamasi duhet të hapin negociatat. Nëse bisedimet vazhdojnë përtej kufirit gjashtë-javor, armëpushimi do të vazhdojë për sa kohë që bisedimet janë duke vazhduar, thuhet në rezolutë.
Izraeli supozohet të tërhiqet nga zonat e banuara në Gaza dhe të lirojë disa të burgosur palestinezë në këmbim të disa pengjeve në robërinë e Hamasit.
Faza e dytë do të shihte kthimin e të gjithë pengjeve të mbetura të gjallë, ndërsa faza e tretë do të përfshinte dorëzimin e trupave të robërve të vdekur dhe një “plan të madh rindërtimi” të udhëhequr nga SHBA për enklavën palestineze.
(A.A/BalkanWeb)
