Luis Hamilton feston sot 40-vjetorin e lindjes, një datëlindje që e gjen britanikun si pilot të Ferrarit. Shtatë herë kampioni i botës do të bëjë debutimin e tij në pistë me njëvendëshen e kuqe brenda vetëm dy javësh. Sipas “Motorsport.com” skuderia italiane do të përfitojë sa më shumë nga rregulloret e reja të FIA-s për testimet private me makinat e vjetra.

Në rregulloret sportive të Formulës 1 të vendosura nga FIA dhjetorin e kaluar thuhet: “Çdo garues mund të kryejë një maksimum prej njëmijë (1000) kilometrash TPC (Testimi i Makinave të Mëparshme) në çdo vit kalendarik.

Një distancë e tillë akumulohet në një maksimum prej katër (4) ditëve të lejuara”. Si pasojë, Ferrari do të përdorë 4 ditët dhe 1000 km të testimit të tij këtë muaj për të ndihmuar Luis Hamiltonin të ambientohet me ekipin e tij të ri përpara sezonit 2025. Testimi i parë pritet të bëhet në pistën e skuadrës italiane në Fiorano më datën 20 ose 21 janar, në varësi të motit. Më pas Ferrari do të zhvendoset në Barcelonë, me pistën katalanase të rezervuar për 3 ditë të tjera.

Ndërkohë ende nuk është vendosur nëse Hamilton do të drejtojë makinën SF-23 apo atë të një sezoni më të vjetër të vitit 2022, modelin F1-75. Drejtori i ekipit Frederik Vasër ka deklaruar se nuk është aspak i shqetësuar për përshtatjen e pilotit britanik me Ferrarin. Për sa i përket prezantimit, Ferrari do t’i heqë mbulesën makinës së re më datë 19 shkurt, një javë para fillimit të testimit zyrtar parasezonal në Bahrejn më 26 shkurt.