Sinodi i Shenjtë i Kishës Orthodhokse Autoqefale të Shqipërisë zgjodhi sot, më 16 mars 2025, Imzot Joanin si Kryepeshkopin e ri të Tiranës, Durrësit dhe gjithë Shqipërisë. Vendimi u mor unanimisht pas Liturgjisë Hyjnore, në përputhje me Statutin e Kishës.

Zgjedhja e tij u shpall zyrtarisht në Katedralen e “Ngjalljes së Krishtit” në Tiranë, ku besimtarët e pranishëm brohoritën “Aksios” (I Denjë) në shenjë miratimi. Në ceremoninë solemne, Kryepeshkopi ri lexoi dhe nënshkroi Mesazhin e Madh, duke pranuar detyrën.

Imzot Joani, i cili ka shërbyer si Mitropolit i Korçës për 27 vjet, ka qenë një nga bashkëpunëtorët më të afërt të Kryepeshkopit të ndjerë Anastas. Ai ka luajtur një rol kyç në rindërtimin e Kishës Orthodhokse në Shqipëri, zhvillimin e arsimit teologjik dhe forcimin e veprimtarive bamirëse. Me një formim të spikatur akademik dhe një karrierë të gjatë në teologji, ai ka dhënë një kontribut të rëndësishëm në dialogun ndërfetar dhe përkthimin e teksteve të rëndësishme fetare.

Sipas Kishës Orthodokte, zgjedhja e tij shihet si një vazhdimësi e misionit të Kryepeshkopit Anastas, me fokus në forcimin e komunitetit orthodhoks dhe promovimin e vlerave të bashkëjetesës dhe solidaritetit.

Njoftimi i Kishës Orthodhokse Autoqefale të Shqipërisë:

Sot, më 16 mars 2025, të dielën e dytë të Kreshmës, kushtuar Shën Grigor Palamait, pas Liturgjisë Hyjnore dhe në përputhje me Traditën e Shenjtë dhe Statutin e Kishës Orthodhokse Autoqefale të Shqipërisë, u mbajt në Qendrën Sinodike në Tiranë mbledhja e Sinodit të Shenjtë të Kishës Orthodhokse Autoqefale të Shqipërisë me qëllim zgjedhjen e Kryepiskopit të ri. Pas lutjes, anëtarët e Sinodit të Shenjtë, nën kryesinë e Mbikëqyrësit të Fronit Kryepiskopal, Hirësisë së tij Mitropolitit të Korçës Imzot Joanit, me vota kanonike në mënyrë unanime zgjodhën njëzëri pasuesin e të ndjerit Kryepiskopit Anastas.

Hirësia e tij Mitropoliti i Korçës Imzot Joani u zgjodh Kryepiskop i Tiranës, Durrësit dhe gjithë Shqipërisë dhe Primat i Kishës Orthodhokse Autoqefale të Shqipërisë.

Më pas, në Katedralen e “Ngjalljes së Krishtit”, u zhvillua ceremonia e Mesazhit të Madh, ku Sinodi i Shenjtë njoftoi zyrtarisht rezultatin e zgjedhjes të nënshkruar nga të gjithë Kryepriftërinjtë e Kishës Orthodhokse Autoqefale të Shqipërisë: Mitropolitët e Korçës, Gjirokastrës, Apolonisë, Elbasanit, Beratit, Amantias dhe Episkopi i Krujës. Besimtarët orthodhoks që kishin mbushur katedralen dhe oborrin e saj, në një atmosferë gëzimi dhe lavdërimi ndaj Zotit, thirrën “Aksios” (I Denjë) për Primatin e ri të Kishës së Shqipërisë. Në vijim Kryepiskopi i ri Imzot Joani lexoi Mesazhin e Madh dhe e nënshkroi atë në Tryezën e Shenjtë, duke konfirmuar zyrtarisht pranimin e detyrës së lartë.

Kryepiskopi i porsazgjedhur Imzot Joani ka qenë bashkëpunëtor i ngushtë i të ndjerit Kryepiskop Anastas për 32 vjet, nga të cilat 27 vite si Mitropolit i Korçës. Ai është dalluar për veprën e tij baritore dhe kontributin në rindërtimin e Kishës, zhvillimin e arsimit teologjik dhe forcimin e veprimtarive bamirëse të Kishës. I diplomuar me rezultate të shkëlqyera në studimet teologjike në SHBA, ai u kthye në Shqipëri për të kontribuar përkrah Kryepiskopit Anastas në rimëkëmbjen e Kishës së shkatërruar të Shqipërisë. Që nga viti 1993 ka shërbyer si profesor në Akademinë Teologjike të Durrësit, përkthyes i shumë teksteve teologjike dhe autor i tekstit të parë të Dogmatikës në gjuhën shqipe. Ai themeloi revistën “Tempulli”, përfaqësoi Kishën në takime ndërortodokse dhe ndërkristiane dhe është nderuar me tituj të spikatur për kontributin e tij në kulturë, arsim dhe dialog ndërfetar.