Një shqiptar u arrestua nga policia malazeze, ndërsa rezulton i kërkuar nga autoritetet ligjzbatuese franceze.

Oficerët e Sektorit të Policisë Kufitare të Malit të Zi gjatë kontrollit kufitar në pikën kufitare Sukobin (Muriqan), kanë ndaluar shtetasin shqiptar F. S, për të cilin ka një urdhër-arresti nga Franca.

Shqiptari është dënuar me 3 vjet burg nga gjykatat franceze me akuzën e vjedhjes dhe vjedhjes me anë të mashtrimit në mënyrë të organizuar dhe të dhunshme. “Vendimi është dhënë nga Gjykata Penale në Grasse të Francës”, tha Drejtoria e Policisë së Malit të Zi, referuar ndalimit të shqiptarit.

Ky i fundit pritet të përballet me gjyqtarin hetues të Gjykatës së Lartë në Podgoricës, për të vijuar më pas me procedurat, nëse do të ekstradohet drejt Francës ose jo.