VLORË- Një ditë pas ngjarjes së rëndë të ndodhur në Himarë, ku mbeti i vrarë një turist rus, policia e Vlorës ka vënë në pranga autorin e dyshuar. Sipas të dhënave zyrtare, është arrestuar në flagrancë për “Vrasje nga pakujdesia”, 44-vjeçari Fatmir Kuçi, 44 vjeç, banues në Elbasan.
Shërbimet e Policisë kanë bërë arrestimin e Fatmir Kuçit, pasi ditën e djeshme rreth orës 11:00 në zonën bregdetare të quajtur “Livadh” në Himarë, ky shtetas duke drejtuar mjetin lundrues tip skaf-plastik me mbishkrimin “Black Arrow”, dyshohet se ka dëmtuar aksidentalisht shtetasin Rus D.K., i cili ka gjetur vdekjen për shkak të plagëve të marra, në spitalin e Himarës.
Policia ka sekuestruar dhe konfiskuar 2 mjete lundruese në përdorim dhe në pronësi të Kuçi-t, mjetin lundrues skaf-plastik me mbishkrimin “Black Arrow” 11.73 m i gjatë dhe 3.20 m i gjerë, me 3 motorë – 275 KF secili si dhe mjetin lundrues motor-deti me emrin “Viktoria-3”, pa dokumentacion përkatës.
Denis Kaiumov, 43 vjeç, banues në Saint Petersburg, Rusi mbeti i plagosur paraditen e djeshme ndërsa notonte rreth 50 metër nga bregu i Livadhit, ku kishte shkuar me pushime nën shoqërinë e bashkëshortes dhe vajzës së tij.
Dyshohet se mjeti ujor i ka kaluar sipër pushuesit i cili po lahej në det, duke i shkaktuar prerje të mëdha në trup dhe humbjen e njërës gjymtyrë. Ai është dërguar menjëherë në spital, por nuk mundi të mbijetojë. Pas aksidentit horror, mjeti që e ka goditur është larguar nga vendngjarja dhe vetëm sot është bërë i mundur arrestimi i drejtuesit të tij.
(m.k/BalkanWeb)
