Policia shqiptare ka vënë në pranga një 28-vjeçar i kërkuar nga shteti fqinj që prej muajit janar.

Sipas të dhënave zyrtare është ndaluar shtetasi Ermir Gjeloshi, 28 vjeç, pasi Prokuroria Pistoja/Itali më datë 29.01.2019 ka lëshuar urdhër arrestin, për veprën penale të “Vjedhjes në rrethana rënduese” parashikuar nga nenet 110, 157, 624-bis, 625, 582, 585 të Kodit Penal Italian.

Gjeloshi nuk është një emër i panjohur as për policinë shqiptare, pasi figuron me precedentë penalë dhe i arrestuar më parë për plagosje, kanosje, armëmbajtje pa leje e prodhim e shitje narkotikësh.

NJOFTIMI
Vijon zbatimi i Planit të masave për goditjen e paligjshmërisë, kapjen e personave në kërkim, si dhe për parandalimin e kultivimit të bimëve narkotike. Kapet dhe ndalohet një shtetas i shpallur në kërkim ndërkombëtar me qëllim ekstradimin drejt Italisë
Arrestohet në flagrancë një shtetas për armëmbajtje pa leje dhe kultivim të bimëve narkotike
Nga strukturat e Drejtorisë Vendore të Policisë Shkodër si rezultat i një pune të mirëorganizuar, dhe në bazë të informacioneve të marra në rrugë operative, në bashkëpunim me Interpol Tirana, u bë e mundur kapja dhe ndalimi i shtetasit të shpallur në kërkim ndërkombëtar:
E. Gj., 28 vjeç, banues në Shkodër. Arrestimi provizor i këtij shtetasi u bë pasi Gjykata e Pistoia/ Itali, më datë 29.01.2019, ka caktuar masën e sigurisë “Arrest në burg”, për kryerjen e veprës penale “Vjedhje në rrethana rënduese”, parashikuar nga Kodi Penal Italian. Maksimumi i dënimit 10 vjet.

Gjithashtu nga strukturat e Komisariatit të Policisë Shkodër në mbështetje të Forcës së Posaçme Shqiponja, në bazë të informacioneve të marra në rrugë operative u arrestua shtetasi:
Fatlum Halili, 55 vjeç, banues në fshatin Dragoç, Shkodër,

Gjatë kontrollit të ushtruar në banesën e tij, Policia gjeti dhe sekuestroi në cilësinë e provës materiale një armë zjarri kallashnikov dhe municion luftarak, si dhe në oborrin e banesës së tij ju gjetën të kultivuar disa fidanë Cannabis Sativa.

Materialet iu referuan Prokurorisë së Rrethit Gjyqësor Shkodër për veprime të mëtejshme për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Kultivimi i bimëve narkotike”, parashikuar nga nenet 278 e 284 të Kodit Penal.

(BalkanWeb)