TIRANE – Prangoset për armëmbajtje pa leje djali 16-vjeçar i deputetit demo-krat Mhill Fufi. Burime zyrtare nga policia bëjnë të ditur se shtetasi G.Fufi 16 vjeç, ishte përfshirë në një konflikt me disa persona të tjerë në shkollën “Vasil Shanto” në datën 1 dhjetor.

Burimet thonë se një grup djemsh më të mëdhenj se 16- vjeçari i kishin ngacmuar G. Fufit të dashurën M.B. dhe për këtë arsye ai i kishte goditur me mjete të forta. Dy të rinjtë ishin në një klasë dhe merrnin mësim në shkollën “Besnik Sykja”.

Një ditë më vonë, pas grindjes, në një mesazh të ardhur në “Instagram”-in e një shoku të 16-vjeçarit G. Fufi, personat me të cilët ishte grindur e kanë kërcënuar duke i thënë se do të paguajë për goditjen që u ka dhënë. I frikësuar nga reagimi i tyre, 16-vjeçari ka siguruar një pistoletë tip “Ekol” me tre fishekë në Laç dhe prej dy ditësh e mbante me vete në shkollë, duke e kishte fshehur në çantën e shoqes së klasës M. Bufi, e cila gjithashtu është arrestuar nga policia. Efektivët e policisë janë lajmëruar që në datën një dhjetor për incidentin mes të rinjve dhe po i mbanin nën vëzhgim. Pas informacionit të marrë, efektivët e komisariatit nr. 2 bënë të mundur identifikimin e personave të përfshirë në konflikt dhe gjetjen e armës tip pistoletë “Ekol” me tri fishekë në çantën e 17-vjeçares M. Bufi, nxënëse në shkollën “Besnik Sykja”.

Policia shoqëroi edhe shtetasit S.Shtaro dhe A.Has-madhi si persona që kanë dijeni për ngjarjen. Mbi djalin e deputetit tashmë të arrestuar rëndon akuza e “Armëmbajtje pa leje”, ndërsa shtetasja M.Bufi akuzohet për “Armëmbajtje pa leje” dhe “Moskallëzim krimi”. Policia procedoi në gjendje të lirë dhe shtetasin A.Hasmadhi për veprën penale “Moskallëzim krimi”. Nga ana tjetër, policia po punon për identifikimin e personit që i shiti apo i dhuroi armën 16-vjeçarit.
(er.nu/Gazeta Shqiptare/BalkanWeb)