Presidenti i Venezuelës Nicolas Maduro, është zotuar të rifillojë bisedimet me Shtetet e Bashkuara, të cilat rivendosën sanksionet ndaj industrisë jetike të energjisë të vendit në prill.

Njoftimi vjen më pak se një muaj para se vendi i Amerikës së Jugut të shkojë në kutitë e votimit për zgjedhjet presidenciale, në të cilat Maduro kandidon për një mandat të tretë radhazi.

Duke folur në një fjalim televiziv të hënën, presidenti aktual, njëherazi aleat i ngushtë i Rusisë dhe Vladimir Putinit, tha se Uashingtoni kishte kontaktuar me Karakasin me një propozim për të rivendosur dialogun.

“Pasi e kam menduar për dy muaj, kam pranuar dhe të mërkurën e ardhshme do të rifillojnë bisedimet me qeverinë e Shteteve të Bashkuara për të respektuar marrëveshjet e nënshkruara në Katar dhe për të rivendosur kushtet e dialogut urgjent”, tha Maduro, sipas Associated Press.

Negociatori zyrtar venezuelian Jorge Rodriguez do të udhëtojë për bisedimet, shtoi presidenti, pa detajuar temat specifike që do të diskutohen ose ku do të zhvillohet raundi i fundit i dialogut.