Një inspektor i hetimit tatimor është dhunuar dje gjatë detyrës ndërsa ishte duke ushtruar kontroll në një subjekt në zonën e Golemit. Mësohet se punonjësi, pjesë e një grupi inspektorësh të sektorit të zbatimit në Drejtorinë e Hetimit Tatimor është goditur nga pronari i subjektit, të cili i është bllokuar aktiviteti për 30 ditë për shkak se nuk lëshonte kuponin tatimor.


Inspektori është dërguar në spital pasi ka pasur hemorragji në hundë dhe sy, ndërsa autori është arrestuar nga policia.


Ndërkohë Ministria e Financave dhe Ekonomisë ka dënuar dhunën dhe thotë se beteja kundër informalitetit është beteja e përbashkët me sipërmarrjen e ndershme, në favor të qytetarëve dhe zhvillimit ekonomik të vendit.


DEKLARATA E PLOTË E MFE
Ministria e Financave dhe Ekonomisë dënon dhunën e ushtruar ndaj inspektorit të hetimit tatimor në detyrë.
Një incident është shënuar ditën e diel në zonën e Golemit gjatë ushtrimit të detyrës nga grupi i inspektorëve të Sektorit të Zbatimit, Drejtoria e Hetimit Tatimor.
Grupi i punës i përbërë nga inspektorët M.S., G.C. dhe O.B. u paraqit për të kryer kontroll në subjektin “Fatime Morina”, në zonën e Golemit, pranë “Pishave të Buta”. Gjatë kontrollit u konstatua se subjekti ushtronte aktivitetin në fushën e shërbimit, pa lëshuar kupon tatimor, shkelje e përsëritur nga subjekti në fjalë, në kundërshtim me ligjin 9920 ( I ndryshuar) neni 122, pika 1, germa b(ii).
Referuar kësaj shkelje, inspektorët e zbatimit informuan subjektin për penalizim me masën bllokim aktiviteti për 30 ditë kalendarike.
Gjatë kryerjes së procedurave nga inspektorët, ata kanë hasur në rezistencën e pronarit të subjektit, i cili ka ushtruar dhunë fizike ndaj inspektorit O.B. duke e goditur në fytyrë, goditje e cila i ka shkaktuar inspektorit frakturë dhe hemorragji në hundë dhe sy.
Si rrjedhojë e kësaj ngjarje, u njoftuan forcat e Rendit. Inspektori u dërgua fillimisht për mjekim pranë spitalit të Durrësit dhe më pas u dërgua për trajtim më të specializuar pranë spitalit Ushtarak në Tiranë.
Inspektorët e zbatimit, po kryenin kontrolle në zonë në zbatim të planit të masave për sezonin turistik veror.
Ministria e Financave dhe Ekonomisë dëshiron të përsërisë mesazhin e qartë se të gjithë strukturat tatimore të zbatimit dhe terrenit, mbeten të angazhuar për të vijuar zbatimin rigoroz të planit të masave për sezonin turistik. Beteja kundër informalitetit është beteja jonë e përbashkët me sipërmarrjen e ndershme, në favor të qytetarëve dhe zhvillimit ekonomik të vendit.
Ne mbetemi këmbëngulës tek ligji, por patjetër tejet bashkëpunues me sipërmarrjen, për ta informuar, asistuar dhe këshilluar për vetëkorrigjim dhe rritje të pajtueshmërisë me ligjin.

(BalkanWeb)