22 ndeshje radhazi kishte Bayern Munich që nuk pësonte humbje në shtëpi, në Champions League, ky detaj e bën edhe më të bujshme suksesin e Inter në “Allianz Arena”. Përtej kësaj fitoreje, në shtëpinë zikaltër nuk festojnë, të vetëdijshëm se Bayern Munich është një ekip i madh, i aftë të përmbys rezultate të tilla. Përveç fitores 2-1 të arritur në Mynih, Simone Inzaghi merr lajme të tjera pozitive në vigjilje të ndeshjes së kthimit më 16 prill.

Për këtë takim, Inzaghi do të ketë dispozicion anësorin e tij të preferuar, Dimarco-n. Inzaghi pati guximin që e ruajti në Mynih edhe pse Dimarco mund të luante disa minuta, minuta të cilët pritet t’i marrë këtë fundjavë përballë Cagliari-t, për të zbritur më pas si titullar kundër Bayern në “San Siro”. Thuajse e pamundur është prezenca e Dumfries në këtë takim, me anësorin holandez që rrezikon edhe derbin kundër Milanit në Kupë.

I ndryshëm është diskutimi në radhët e Bayern Munich. Në aktin e parë kundër Inter, Kompany ishte i detyruar të bënte pa shërbimet e Neuer, Upamecano, Davies, Ito, Pavlovic, Coman e Musiala. Nga 7 mungesat e mëdha, vetëm Pavlovic dhe Coman mund të rikuperohen. Sulmuesi francez ka një shqetësim në këmbën e majtë, mund të rikthehet në fushë në çdo moment, por është thuajse e pamundur që të jetë nga minuta e parë. Ndërkohë Pavlovic është rikthyer të stërvitet me pjesën tjetër të ekipit pas një kohë të gjatë, shanset për ta parë në fushë kundër Inter janë të mëdha.

(BalkanWeb)