Mbesa e diktatorit fashist Benito Musolini njoftoi dje, të enjten, se po largohet nga partia “Vëllezërit e Italisë” të Giorgia Melonit sepse është “shumë e djathtë”.
Raquelle Mussolini, një këshilltare e qytetit në Romë, tha se ajo po shkon në partinë Forza Italia, e cila është pjesë e koalicionit qeverisës të Italisë, por që shihet si më liberale për të drejtat civile.
“Është koha për të kthyer faqen dhe për t’iu bashkuar një partie që mendoj se është më afër ndjeshmërisë time të moderuar dhe qendrore,” tha 50-vjeçarja për agjencinë e lajmeve Ansa.
Sipas Guardian, Musolini, e cila fitoi më shumë vota se çdo kandidat tjetër në zgjedhjet e fundit komunale në Romë në vitin 2021, kohët e fundit kishte diskutuar qëndrimin e “Vëllezërit të Italisë” për të drejtat e pakicave. E njohur për mbështetjen e saj për të drejtat e anëtarëve të komunitetit LGBTQ+, ajo ka thënë se “nuk i ka pëlqyer kurrë” përshëndetja fashiste, të cilën disa anëtarë dhe mbështetës të partisë e bëjnë ende gjatë përkujtimeve.
Muajin e kaluar, Raquel Mussolini u ndesh me kryeministren Meloni mbi polemikën mbi gjininë e Iman Kelif, një boksier algjerian që konkurroi kundër Angela Carini të Italisë në Lojërat Olimpike. Pasi Carini u largua nga ndeshja kundër Kelif – i cili më vonë fitoi medaljen e artë – Meloni tha se nuk ishte një ndeshje mes të barabartëve sepse algjeriani kishte dështuar në një kontroll të përshtatshmërisë gjinore në Kampionatin Botëror të vitit të kaluar.
“Derisa të vërtetohet e kundërta, Iman Khalifa është një grua. Dhe ajo po i nënshtrohet një gjuetie shtrigash pa e merituar diçka të tillë ”, tha Musolini, duke mbështetur sportistin algjerian.
Këshilltarja 50-vjeçare mban emrin e gjyshes së saj, Raquelle Guidi, gruaja e dytë e Benito Musolinit, themeluesit dhe udhëheqësit të partisë fashiste që sundoi Italinë nga viti 1922 deri në 1943 si diktator dhe u ekzekutua në vitin 1945 nga rebelët italianë.
“The Duce” kishte pesë fëmijë me Raquelle Guidi, duke përfshirë babain e politikanes, një pianist xhaz i quajtur Romano, i cili vdiq në vitin 2006.
“Vëllezërit e Italisë” janë trashëgimtarët kryesorë të ekstremit të djathtë italian të shprehur fillimisht nga Lëvizja Sociale Italiane ( MSI), një parti neo-fashiste e formuar në vitin 1946 nga mbështetësit e regjimit të Musolinit dhe ish-anëtarë të rangut të lartë të partisë së tij fashiste. Partia e Melonit ende mban logon e saj të partisë me MSI, një flakë trengjyrësh.
Meloni është përpjekur ta paraqesë partinë e saj si një grup konservator. Që nga marrja e detyrës atë vit, qeveria e saj ka ndjekur politika të ashpra për emigracionin, abortin dhe prindërimin e të njëjtit seks.
