Qeveria e Katarit ka informuar SHBA-në dhe Izraelin se do të ndalojë përpjekjet e ndërmjetësimit për të ndalur konfliktin në Gaza, sepse nuk mendon më se palët po negociojnë në mirëbesim.

Shteti i Gjirit ka arritur në përfundimin se bisedimet janë bërë një futboll politik dhe përpjekjet e tij për t’i lehtësuar ato po gjeneronin kritika ndaj tij, sipas një burimi diplomatik të informuar për situatën.

“Për sa kohë që ka një refuzim për të negociuar një marrëveshje me mirëbesim, ata nuk mund të vazhdojnë të ndërmjetësojnë”, tha burimi.

Lëvizja e Katarit është goditja e fundit e madhe ndaj një përpjekjeje të lëkundur për t’i dhënë fund luftimeve në Gaza, të cilat nuk kanë dhënë rezultate të rëndësishme që nga një marrëveshje e përkohshme armëpushimi dhe lirimi i pengjeve gati një vit më parë.

Por me marrjen e pushtetit nga një administratë e re amerikane në pak më shumë se dy muaj, Katari gjithashtu ua kanë bërë të qartë kontakteve të SHBA-së se do të ishin të gatshëm të rifillonin ndërmjetësimin nëse të dyja palët tregonin një “gatishmëri të sinqertë” për të arritur një marrëveshje.

Katari informoi Izraelin, zyrtarët e Hamasit , SHBA-në dhe Egjiptin për vendimin pasi një delegacion amerikan, përfshirë drejtorin e CIA-s, vizitoi Dohën për takime jopërfundimtare në fund të tetorit.

Qeveria e saj kishte arritur në përfundimin se palët ndërluftuese ishin të përqendruara në “optikën politike” në vend të shqetësimeve të vërteta të sigurisë, tha burimi diplomatik, dhe kishte përpjekje për të minuar procesin “duke u tërhequr nga disa prej angazhimeve”.

Kjo është hera e dytë që Katari ka paralajmëruar publikisht se nuk është i përgatitur të luajë për një kohë të pacaktuar mikpritës të bisedimeve pa rrugëdalje.

Në një deklaratë të lëshuar pasditen e së shtunës, Katari tha se raportimet e përhapura në media për një mbyllje të planifikuar të zyrës politike të Hamasit në Doha ishin të gabuara.

Zyra ishte një kanal i dobishëm komunikimi midis “palëve të interesuara”, tha Katari.

Në prill Doha u kishte kërkuar shkurtimisht komandantëve të Hamasit të largoheshin nga vendi, pasi kryeministri, Mohammed bin Abdulrahman al-Thani, njoftoi se Katari do të rishikonte rolin e tij ndërmjetësues.

Ata u nisën për në Turqi, por brenda disa javësh Izraeli dhe qeveria amerikane i kishin kërkuar Katarit t’i kthente ata në mënyrë që të intensifikonin negociatat.

Zyra e Hamasit në Doha u hap në vitin 2012, me kërkesë të administratës Obama. Për më shumë se një dekadë ajo ka ofruar një kanal kyç komunikimi për grupin, përfshirë gjatë bisedimeve të vitit të kaluar për të rënë dakord për një armëpushim në Gaza dhe lirimin e më shumë se 100 pengjeve.

Megjithatë, që nga ajo marrëveshje në nëntor 2023, bisedimet që synonin arritjen e një marrëveshjeje të dytë kanë dështuar në mënyrë të përsëritur dhe Katari është vënë nën kritika në rritje në Izrael dhe nga pjesë të establishmentit politik amerikan.

Një grup senatorësh republikanë amerikanë të premten i kërkuan Uashingtonit që të kërkojë ekstradimin e zyrtarëve të Hamasit në Katar dhe të ngrijë asetet e tyre.

(BalkanWeb)