Rendi social në Gaza mund  të shembet më tej, nëse Izraeli vazhdon me kërcënimin e tij këtë muaj për t’i dhënë fund të gjithë bashkëpunimit me agjencinë e OKB-së për refugjatët për palestinezët, ka paralajmëruar Louise Waterridge, oficerja e lartë e urgjencës.

Waterridge, e cila pas kthimit  nga Gaza, e përshkroi territorin si gjithnjë e më të thyer dhe tha se dy projektligjet e Knessetit që do të hynin në fuqi në fund të muajit, duke bllokuar bashkëpunimin me agjencinë, do ta bënin të pamundur funksionimin ose shpërndarjen e ndihmës nga Unrwa në një zonë lufte.

“Nëse ne nuk jemi më në gjendje të komunikojmë me autoritetet izraelite, nuk kemi më një proces dekonflikti në vend, kështu që asnjë nga ndërtesat tona nuk do të dekonfliktohet ose mbrohet më dhe ne thjesht nuk do të jemi në gjendje të jemi atje”, tha ajo.

Ajo shtoi  se nuk dinte asnjë plan B për atë që mund të ndodhë, pas afatit që Forcat e Mbrojtjes të Izraelit t’i japin fund bashkëpunimit.

Dy projektligje u miratuan nga Knesset në tetor për të ndaluar Unrwa-në nga “çdo aktivitet” dhe për ta shpallur atë një grup terrorist pas pretendimeve nga Izraeli se anëtarë të stafit të Unrwa-së në Gaza ishin përfshirë në sulmet e 7 tetorit të Hamasit që çuan në vdekjen e më shumë se 1200 izraelitë

OKB-ja nisi një hetim mbi pretendimet izraelite dhe pushoi nëntë punonjës të Unrwa si rezultat.