Kryeministri Edi Rama, në një komunikim me qytetarët në rrjetet sociale, foli mbi procesin e integrimit të Shqipërisë në Bashkimin Evropian dhe përpjekjet e qeverisë për luftën kundër korrupsionit.
Rama theksoi se Shqipëria është në një moment kyç për anëtarësimin në BE, duke argumentuar se qëndrimi i partnerëve evropianë është më i favorshëm se kurrë. “Ata jo vetëm thonë ‘ju duam në BE’, por ‘ju duam tani në BE’,” u shpreh ai, duke shtuar se Shqipëria është tashmë në pararojë të procesit të anëtarësimit.
Në lidhje me luftën kundër korrupsionit, kryeministri deklaroi se në Shqipëri po merren masa të pa realizuara më parë, duke nënvizuar se për herë të parë persona me lidhje me pushtetin politik po përballen me drejtësinë. “Ne kemi sjellë një risi historike që nga qeveria e parë në vitin 1912,” theksoi Rama, duke vlerësuar pavarësinë e gjyqësorit në këtë proces.
“Korrupsioni në Shqipëri po luftohet. Për herë të parë po ndodh që njerëz me pushtet politik thirren nga prokurorë të pavarur nga pushteti politik. Kush thotë se kjo s’ka lidhje me PS, nuk thotë të vërtetën, jemi unë dhe PS që e kemi sjellë këtë risi historike në jetën shqiptare. Që nga 1912, kur është ngritur flamuri pavarësisë dhe deri para pak ditësh në Shqipëri kurrë një person i lidhur me pushtetin politik nuk është hetuar dhe gjykuar nga një drejtësi e pavarur. Në këtë zyrë gjendej shpata që duhet të rrijë gjithnjë në dorën e zonjës së drejtësisë. E kishte pushteti politik, ne e dorëzuam shpatën, ky është kulmi i vullnetit për të luftuar korrupsionin”, tha Rama.
